Chanmari aia huai Police

Zote Toyota MPL10 a hmunawm chho zel a, nimin tlaia Chanmari FC leh Mizoram Police inkhel pawh a hmuhnawm ber zinga mi a ni. K. Malsawmkima enkawl Chanmari FC-in 2-0 in hma hruai mah se Lalbiaksanga Colney hoten an si phurh a sut zo a, 2-2 in inkhel a tawp.

Chanmari hian point thum an hlawhchhuah theih loh avangin Chawnpui nen point 11 ve ve an hmu a, goal difference nei ṭha zawk Chawnpui FC chu hmahruaitu an ni. Police-in point khat an sual chhuah zarah Aizawl FC nen point riat ve ve an hmu a, head to head-a an phak loh avangin palinaah an la awm a ṭul thung.

Chanmari hun

Chanmari FC-in bul ṭantu zingah Lalkhawpuimawia (Mapuia) leh Crespo Vanlalhriapuia te an dah lo a, an squad chhahzia a lang. Police-in second half-a lut turin Lalbiakhlua (Biaktea) te bench-ah an dah ṭha.

Coach Mala'n player naupang zawk midfielder Mangboi leh forward Lalruatmawia te a rin ang thoin BS-a Colney pawhin midfielder Michael Lalbiaksanga leh forward F. Lallawmkima te chungah rinna a nghat ve bawk.

Inkhel an ṭan a, Chanmari FC-in inrintawkna an ngah tih a lang. Police tlarhnunga ding Lalrinzuala leh Lalhmunmawia te tan hna an siam tam a, goalkeeper F. Lalmuanawma'n hna a ngah.

Chanmari goal bawh a na a, mah se tlarhmaah R. Laldanmawia awm lo an tuar - goal khung an harsat. Mahse, first half injury time-ah Police an vannei ta a, Lalpianthanga cross chu Police defender Rinzuala'n an lamah a tilut.

Second half ṭan aṭanga minute hnihna lekah Lalthangliana (AB-a) corner pet chu defender lian ṭha Ramngaihsanga'n goal-ah a chantir bawk. A lan dan mai chuan Chanmari hian goal tam zawk an khung dawn niin a lang.

Police hun

Mizoram Police danglamna a rawn lang a, BS-a hote hian tlawm mai an tum lo. Bench aṭanga lut Biaktea chu danglamna siamtu a ni a, a luh hnuah Police goal bawh a na sawt.

Minute 61-naah Police bench aṭanga lut tho Lalrothlanga'n Chanmari keeper Zothanmawia tih ṭhat tawk loh chu goal-ah a chantir a, Rothlanga hian goal a khung hnuah inrintawkna a ngah sawt - a chevel pawh a hmuhnawm hle.

Point thum hlawh chhuak ngei tura ngaih tawh Chanmari an talbuai a, Police goal bawh a na ta zawk. Minute 77-naah Lalthantluanga (Mama) hmangin Police-in si phurh an sut zo a, a tawpah phei chuan chak thei dinhmunah an ding. Minute hnih hun pek belh a ni a, Police-in tlem an ti - hei hian hun tawpa team pahnih dinhmun a sawifiah.