Al-Arabi zawmtu Marco Verratti

Italy midfielder Marco Verratti chuan Paris Saint Germain chhuahsanin Al-Arabi a zawm. Qatari club hian pound maktaduai 38.7 sengin an lei chhuak a, season thum chhung daih contract a ziak.

Kum 30 mi Verratti hian 2012 khan PSG hi a zawm a, Paris club tan hian Ligue 1 nomawi ringawt pawh vawi kua ngawt a chawi tawh. An ram Italy chu Euro 2020 khan a champion pui bawk a ni.

Italy international Verratti chuan, "Paris St-Germain tan kum 10 chuang hun ka hmang thei kha ka lawm, player ropui leh ṭha tak takte kiangah hlawhtlinna hrang hrang kan chante kha chhuanawm ka ti hle.

"PSG hi ka thinlungah a cham reng tawh dawn a, engtikah mah ka theihnghilh ngai tawh lo ang - Paris hian ka thinlungah hmun pawimawh a chang kumkhua dawn tawh a ni," tiin Ligue 1 champion thlahna thu a sawi.

PSG aṭangin Al-Hilal chuan tun nipui bazar chhungin Neymar pawh an lo lei tawh bawk. Brazilian forward hi pound maktaduai 77.6 zetin an lei a, Verratti pawh hi Saudi Pro League lamah a kal ve mai a rinawm hman hle - mahse, Qatar lam a hawi ta zawk.

Qatar hian Saudi lam ang emin thawm nei na lo mah se, player langsar tak tak an lo la ve fo tawh. Tun nipuiah pawh Senegal international Abdou Diallo, Southampton midfielder hlui Ibrahima Diallo, Liverpool-a hming chher tak Philippe Coutinho leh Leeds United striker hlui Rodrigo ten Qatar an pan.

PSG president Nasser Al-Khelaifi chuan, "Marco leh Paris Saint-Germain hi kan inzawm tlat tawh dawn a, club tana a thil tih leh sulhnute avangin hriatreng a ni tawh ang, a kal zelna turah duhsakna kan hlan," tiin a sawi.