BLUE CORNER

Asia Cup khelh lai mek mah ni se, a aia min fan zawk leh kan nghahfak chu kum li dana rawn inher chhuak ṭhin ,thla leh lawka kan ram Bharat ngeia ICC World Cup awm tur hi a ni lo thei lo. Chutirual chuan tuna Asia Cup hian a hlimthla tur tamtak a tilang lawk dawn tih erawh a chiang.

Asia Cup

Rohit-a leh a hote hi tun anga an khel zel a nih chuan, Asia Cup na na na hi chu an champion mai a rinawm? Amaherawhchu Rahul Dravid-a'n a enkawl aṭang hian, series leh thil danga che tha fu si hi, Cup ang chi tournament hi Hamara Desh hian an chawi hleithei tlat lo lai hi an mu tan a ni a. A ni tak e, Ravi Shastri-a'n kum 5 chhung a enkawl laia, Virat Kohli a kaptan na hnuai aṭang tawh khan kan ti thei hial ang. He record duhawm lo zet hi tun Asia Cup ah hian hnar aṭanga hlit phawi ang velin thai chhe thei tak maw?

Chakna hi ka chak lohna

Indian batting line up hi a lehkhaah chuan tun dinhmunah na na na chuan khawvel cricket a tawrhlelhawm ber an ni ngei ang. Mahse Thawhlehni zan inkhela , tlema pitch an muan deuh a, Sri Lanka rawlthar Dunith Wellalage-a spin-ah an talbuai tih hai rual a ni lo a, hetah tak hian khatiang ang pitch-a vawi tam tak a inkhelh ṭhin laia India team lo chhanchhuak tawhtu head Coach Rahul Dravid an nei erawh an vannei hle a ni. Infiamna khawvelah hi chuan kan chakna lai ber hi kan chaklohna a ni fo ṭhin an tih kha maw!

Tidamtu kan mamawh

KL Rahul leh Jasprit Bumrah te an dam fel thawkhatah a ngaih theih a. Tin match fitness ṭha tak bakah, a khel ṭha ber ber zinga an ṭang hmuh hian thla a timuang. Shreyas Iyer erawh a lo la dam chiang zan lo a nih hmel a. Vawiin lam hian World Cup hnaa inpuahchahna hnuhnung ber tur, karleh lama Australia nen an inkhelhna tura team chu Ajit Agarkar leh a hote chuan an puan hmel a, eng tak maw boruak ni ang?

Bihchianna

Indian batting line up hi chu sawi buai ngai lo a ni a. A bik takin top 4. Mahse, tumpui bowler-te plan tibuaitu atan vei vuak Ishan Kishan tihloh chu an awm lo lutuk erawh duhthusam famkim lohna pakhat a ni a. Tilak Verma hi stand by ah awm mek a ni a, Shreyas Iyer a damchian hman loh leh malsawmna a ni ve thung dawn a ang .

Virat Kohli emaw, Rohit Sharma pawh hi tel thei dawn lo mah se , batting-ah hi chuan a tihdan a la awm, mahse Hamara Desh hian Asia Cup leh World Cup hi champion an tum a nih chuan, 'Fit' Jasprit Bumrah an mamawh. Bumrah tello chuan Indian bowling attack hi a ha a hriam tawk lo tih chu hai rual a ni lo. Tin, spin department-a Kuldeep Yadav hi form hle mah se, selector ten veivawm pathum ṭhawt an thlang hi an tisual deuh em aw, ka lo ti a. Hetah tak hian Ravichandran Ashwin emaw Yuzvedra Chahal hi Axar Patel aiin, dimension leh variety dang pe atan an tlanglo hi a pawi thui thei mai thei?

I lo thlir zel ang

Asia Cup bakah Australia nen World Cup hma la inenchhina hun an nei a, infiamna khawvelah chuan a hunah tak form hmuh hi a pawimawh ber an ti ṭhin a. A bikin knockout tournament system ah hian a ni leh zual awm e. Tuna kan hmuh chinah chuan, lung a la awi fu e.