Indinthar leh beiseitu Richarlison

Tottenham striker Richarlison chuan an ram Brazil leh club tana a khelh danah tun hma a phak lo tih a inpawm a, taksa mai bakah riltu thar nen khelmual chhungah ṭha lehzual zawka chet theih a inbeisei thu a sawi.

Richarlison hi Brazil tan a feh chhuak a, tlarhma laiah maltlat tir ni mah se goal khung a harsat hle. Bolivia 5-1 ngawt an sawpna inkhelah pawh goal a khung thei lo a, lak chhuah niin Peru lakah pawh thlak a ni zui leh bawk.

Kum 26 mi Richarlison chuan, "Tun hnai thla nga chhung chu khelmual chhungah beisei ka phak lo hle tih ka hria, club tana ka chet ṭhat loh mai bakah Brazil tan pawh goal ka khung thei chuang lo, rilru a hrehawm duh hle.

"South America aṭanga London ka thlen leh hunah chuan boruak a danglam ka beisei, rilru lam doctor hmuin ani chuan ka harsatna ṭhenkhat min sutkiansak theih ngei ka beisei," tiin psychologist a hmuh tur thu a sawi.

Nikum nipui bazar lai khan Everton aṭangin Spurs a zawm a, North London club tan hian goal li chauh a la khung. Tun season kal laiah Tottenham an khel ṭha a, goal khung pawh an harsat lo hle.

Mahse, an forward Richarlison hian Premier League match li a khelh tawh chinah goal a la khung ve miah lo, club tana a che ṭha lo reng a nih chuan Brazil tan pawh inlan phak reng a harsa dawn.

Richarlison chuan, "Brazil jersey hak phak hi ka thil tum leh châk a ni a, chumi tur chuan eng nge ka tih ngai tih pawh ka hria. Tottenham hian ka ṭhatna turin thil hrang hrang min tihsak a, chumi chu chhawr ngei ka tum dawn a ni," a ti.

Premier League table-ah Tottenham hi pahnihna an ni mek, an chungah champion lai Manchester City chiah an awm. Inrinni zan hian Sheffield United an lo mikhual ang.