Poland coach Santos an ban

Fernando Santos chuan Poland national team chu match ruk chauh a enkawl hman a, an beisei ang result an neih loh avangin ban a ni - kum khat chhung pawh a enkawl tling hman lo tihna a ni.

Poland hian Pathianni khan Euro 2024 qualifying-ah Albania chu 2-0 in an ngam lo, an coach Santos kaihhruaina hnuaiah competitive match bikah match nga an khelh aṭangin vawi thum an tlawmna a ni hial.

Kum 68 mi Santos hian an ram Portugal chu Euro 2016 khan a lo champion pui tawh, hei bakah hian Nations League an buatsaih ṭan kum 2018-19 khan hlawhtlinna a chanpui bawk, mahse World Cup 2022 zawh khan a hna a kalsan.

Beiseina thar nen Poland pan mah se a duh leh beisei angin thil a thleng ta lo. Polish Football Association (PZPN) chuan thuchhuah siamin, "Hun rei lote chhunga a hnathawhte avangin a chungah lawmthu kan sawi," an ti.

June thla khan Germany nen friendly match an khel a, he inkhelah hian 1-0 in an chak. Germany an hneh hi Poland coach a nih chhunga Santos hnathawh ropui leh langsar bera chhal theih a ni hial.

European Championship 2024 qualifying-ah Poland hi Group E-ah an awm, match nga an khelh tawh chinah vawi hnih chauh an la chak avangin team panga zingah a hniam ber dawt an ni a, point khat neitu Faroe Islands chiah an hnuaiah an awm.

Poland chungah hian - Albania, Moldova leh Czech Republic te an awm thung. Hmahruaitu Albania nen an inthlauhna chu point li a ni a, match hnih vel an chet fuh chuan sang takah an la inhlangkai thei dawn a ni.