Manager hna a him lo - an daih rei lo ṭhin!
European football-a thuneitu sang ber UEFA chuan tun hnai khan Europe-a football manager-te dinhmun a zirchiang a, chawhrualin manager pakhatin thla 16 bak team pakhat an enkawl hman ngai lo niin an sawi.
Season hman zawh takah khan European football-a top flight league hrang hrangah manager 735 ban an awm a, Europe football chanchina season khata top flight league club enkawltu coach ban an nih hnem pahnihna a ni.
Premier League bikah season hman zawh takah khan coach 15 inthlak danglam a ni a, coach langsar ber ber pawh an chungah zahngaihna lantir a ni chuang lo. Antonio Conte, Julian Nagelsmann leh Steven Gerrard te pawh coach ban langsar zingah an tel a, coach hming ropui tak ni mah se an hming ropuina ringawtin a chhan thei bik lo a, European football-ah manager ban hi a 'in' tlat!
A rei lo
UEFA-in an zirchianna 'European Club Talent and Competition Landscape' a an tarlan dan chuan, European football-a top league 48 an zirchiang a, manager-ten an club-a hun an hman rei zawng chu chawhrualin kum 1.31 ang a ni - kum 2018 (kum 1.3) hnua record chhiat ber ṭum a ni.
UEFA hnuaia ram zingah ram parukah chiah coach-te cham rei zawng chu chawhrualin kum hnih aia tam a ni phak a, a bak zawngah chuan a ni lo - manager 1,209 zingah 5% aia tlem zawk chu an club enkawl meka kum nga aia tam awm tawh an ni phak ṭawk.
Premier League team zinga 55% in manager an siksawi a, Ligue 1 leh La Liga-in English top flight league hi hnaih berin, 50% a ni phak a, Germany-ah chuan 44% leh Italy-ah 35% ten season hmasa khan team enkawltu manager an siksawi.
Season khata manager ban hnem an nih ber ṭum chu 2020-21 season kha niin, kha season-ah khan manager 763 zet chu European football-a top flight league-ah ban an ni a, season hmasaa manager ban zat 735 aiin a la sang zawk.
Premier League hi
Season hman zawh takah khan coach lailawk leh a nghet loa manager lakluhte chhiar tel vekin, Premier League chu coach thlak nasa ber an ni a, manager 22 ngawt thlak danglam an ni - Ligue 1 nen an thlak zat a inang a, European top five league-a coach thlak nasa ber an ni.
Premier League-ah hian tun season-ah coach inthlak pakhat a awm leh der tawh a, Wolverhampton Wanderers boss Julen Lopetegui chuan club thuneitute nen an thu a inhmuh loh avangin Wolves a chhuahsan - coach thar atan Gary O'Neil lak a ni.
Season hmasa khan Premier League-ah manager 41 ngawt kan hmu a, chung zingah coach club parukin coach pathum ṭheuh an nei hman - Chelsea leh Leeds United chuan coach pali ve ve an chhawr hman a, an result-ah erawh nghawng a nei lem lo niin a lang.
Chelsea hi table-ah 12-na niin European football an khel phak lo a, Leeds United chu 19-na niin Championship lamah an relegate thung. Chelsea hian tun season pawh coach thar Mauricio Pochettino hoin bul an ṭan a, Leeds pawhin coach Daniel Farke hoin season bul an ṭan.
Inkhel entu an pung
Covid-19 avangin hun rei tak chhung khelmualah inkhel entu an awm thei lo a, mahse, boruak te ziaawm chhoin, tunah chuan stadium-ah pawh fans sing tel an pungkhawm leh ta - season hmasa lamah pawh inkhel entu an pung nasa hle.
Season hman zawh takah khan fans maktaduai 109-in a hmunah European top flight league an en a, cup match leh division hniam lamte nena chhiar tel vek chuan mi maktaduai 209-in season hmasa khan Europe-ah inkhel an en.
Premier League chu a hmuna inkhel entu ngah ber an ni a, season tluana English top flight league match a hmuna entu belhkhawm chu mi maktaduai 15.3 an tling - chawhrual erawhin league match nei tlem zawk Bundesliga an phak lo.
European league-a club zingah Barcelona chu ṭantu ngah ber an ni a, an home league match entu zat belhkhawm chu season hmasa khan maktaduai 1.59 a tling - Manchester United chu pahnihna niin, season hmasaa Old Trafford-a inkhel entu zat hi mi maktaduai 1.4 an ni bawk.