Chawlh mai tum lo Saina Nehwal

India nula badminton khel thiam Saina Nehwal chuan Paris Olympic 2024 khel tura tlin chu thil harsa a nih tur thu a sawi a, mahse infiamna khawvel mangṭha mai erawh a la ngaihtuah ngai lo tih a sawi thung.

London Olympic bronze medalist Saina hi hliam vangin a buai ngun ta hle a, a khup zai a ngai hial - heng bakah hian hliam tenau a nei ngun hle bawk, a inkhelh tlem bakah result ṭha a neih loh avangin world ranking-ah pawh 55-naah a tlahniam tawh.

Kum 33 mi Saina chuan, "Darkar khat emaw darkar hnih emaw rim taka ka training chuan ka khup a na deuh zel, chuvangin ka tan chuan tun hma lama training ṭha leh hautak ka neih ṭhin ang kha neih theih a ni ngawt tawh lo.

"Doctor ten min chiu a ngai fo a, a nihna takah chuan Paris Olympic khel tura tlin chu thil huphurhawm tak a ni. Dam leh hrisel pangngai taka inkhelh theih a châkawm pawh ka ti hle, mahse duh ang ngawta awm theih a ni si lo," a ti.

A vanglai chuan Saina hi world number 1 a ni thei hial a, khawvela a ṭha berte zinga mi a elphak vek a ni. Mahse, tun season kal laiah tournament paruk chauh a la khel. June thlaa khelh zawh tak Singapore Open hnuah a la inlan leh lo.

Kum 2022 khan tournament 22 a khel a, heng zingah hian vawi khat chiah quarterfinal paltlang a nei a, kum 2021 pawh khan Orleans Masters-a semifinal a luh chu a thlen san ber a ni, season thum chhung chu result ṭha a nei ta lo tihna a ni.

Chawlh hun chungchang zawhna chhangin Hyderabad nula Saina chuan, "Player tu pawh mai hian inkhelh chawlhsan hun chu an nei dawn, chutiang bawkin kei pawh ka hun tawp chu a lo la thleng ang.

"Mi tam tak thusawi ka hriatah chuan, inkhelh nuam an tih loh leh ṭantu leh thlawptu an neih ṭhat loh hnuah infiamna an chawlhsan ṭhin. Tun dinhmunah chuan keichuan inkhelh ka la châk a, thlawptu pawh ka la neih ṭhat avangin chawlh ka la ngaihtuah lo," a ti.