Ram tana inkhel rei ber Lima a chawl

Kum 26 zet an ram tana a inlan hnuah Andorra defender Ildefons Lima chuan inkhelh a chawlhsan a, ram tan match 137-ah goal 11 a khung hman - international football-ah ram tana inlan rei ber record a siam.

Kum 43 mi Lima hian kum 1997 khan kum 17 mi niin ram tana a match hmasa ber a khel a, Estonia lakah 4-1 in an tlawm - he inkhelah hian goal a khung nghal a, Andorra-in UEFA hnuaia ram an nihna anga official match an khelh vawi hnihna chauh a ni.

Thawhlehni zan khan Andorra hian Euro 2024 qualifier match-ah Switzerland an hmachhawn a, 3-0 in an tlawm - he inkhelah hian Lima chuan ram tana a match hnuhnung ber a khel a, Andorra ram jersey nen khelmual a lut leh dawn tawh lo.

Switzerland lakah hian Lima hi minute 23-naah lakchhuah a ni a, Andorra leh Swiss fan-ten kut beng leh ding chungin an thlah - amah thlaktu Ricard Fernandez Betriu chu ram tana a match hmasa ber a khelh aṭanga kum hnih dawna piang ve chauh a ni!

UEFA chuan, "Andorra player Ildefons Lima chu a zinkawng ropui tak, ram tana inlan rei ber record avangin kan lawmpui a ni," tiin X-ah an ziak a, Andorra player ropui an thlah.

Andorra hi mipui 79,000 bawr vel lek chenna niin, Europe-a an awm miau avangin an result pawh a ropui lo - Lima pawh hi international match 100 chuangah a tlawm lamah a tel a, Nations League 2022-a 2-0 a Liechtenstein an hneh kha international match-a an chak hnuhnun ber a ni.

La Liga club Las Palmas leh Rayo Vallecano tan pawha khel tawh Lima hi defender a ni chungin an ram tana goal khung hnem ber a ni mek a, tun nipuia Euro qualifier a khelh khan European Championship qualifier-a inlan thei upa ber record a siam bawk.

Kum 2020 khan player-te chu Covid-19 test tam zawk kalpui ṭula a hriat avangin a lo ṭawng chhuak tawh a, Andorran Football Federation chuan an squad aṭangin an paih phah hial. Mahse, manager Koldo Alvarez leh footballer intelkhawm pawl FIFPRO inrawlh avangin squad-ah telh a ni leh a ni.

Lima hian Switzerland an hmachhawn hma hian, "Kum 26 hnuah a tawp hun a lo thleng ve ta - kan zan hnuhnung ber tur chu," tiin social media lamah a chawlh tur thu hi a lo puang tawh - an ram club FC Andorra B team tan a khel mek a, he club hi Gerard Pique-a ta a ni.