Player ṭha pakhat chauh chawl thei dawn

Baksetball inelna ngaihhlut ber NBA chuan dan thar an hmang dawn a, season thar aṭang chuan inkhel pakhata player ṭha an chawlh rual ṭhup ang kha a rem dawn tawh lo, pakhat bak awltir phal a ni dawn lo.

Player ṭha (star player) teh nan hian tun hnai season thum chhunga All-NBA Team emaw NBA All-Star emaw a tel phak chinte an ni ang, an dam a nih phawt chuan inkhel loa awltir ngawt a theih dawn lo a, dollar maktaduai khat thlenga chawi theih a ni dawn.

NBA commissioner Adam Silver chuan, "Player dam leh hrisel ṭha a nih chuan inkhel ngei tura beisei a ni, a chhan chu mipui ten player ṭha inkhel an en châk a, chumi tur chuan sum sengin ticket pawh an lei ṭhin," a ti.

Kumin October 24 aṭanga kum 2024 April 19 chhungin regular season an khel dawn, hetih chhung hian match 82 teh meuh khelh tur an nei a, a tiṭha zual pariat chin phei chuan playoff an khel chhunzawm ṭhin.

Playoff hi best of seven series hmang chak zawk zawnna a ni tawh a, chuvangin season khat chhunga NBA team ṭhaten match an khelh hi a tam ṭhin hle a, chhuanlam hrang hrang siama inkhel lo an awm fo reng a ni.

Ruahmanna an siam thar ang chuan, inkhel pakhatah hian star player pakhat chu hliam vang ni loin an hahchawlhtir thei dawn. Mahse, natna nei lo a nih chuan mipui lamin an hmuh theih turin stadium-ah a kal tho a ngai dawn a ni.

NBA hi North America ram chhunga khawpui hrang hrangah an khel ṭhin a, a vanglai phei chuan ni khat dan lek leka match khelh a ngaih chang pawh a awm. dan tharah hian a hautak zual dawn niin a lang a, mahse Silver-a chuan entu leh mi tam ber duh dan an zawm tih a sawi thung.