City khelmualah Liverpool - a hmuhnawm dawn

Premier League team hmuhnawm ber thlang dawn ta ila, Liverpool leh Manchester City inkarah thlan tur zawk hriatthiam a harsa khawp ang. Team pahnih hi Pathianni zan dar 10:00-ah league match khel turin an intawng dawn. 

Team pahnih hi season dang ang lo takin talbuai ve deuh mah se Premier League-a champion tura rinkai an la ni reng tho a, zanin inkhel hi a hmuhnawm loh ring suh. 

Reds-in inelna hrang hranga an match hnuhnung pangaah hnehna an chang vek a, City hian match thum chhung chu a zawnin hnehna an chang ve leh ta bawk. 

Tlarhnung hi

Liverpool tlarhnungah Virgil van Dijk inhliam hnuin Fabinho a inhliam ve leh a, he thu buatsaih thleng hian Joel Matip dinhmun a chiang lo - Jurgen Klopp-a'n Rhys Williams leh Nathaniel Phillips aṭangin duh zawk a thlan a ngai. 

Nat-a hian league-a an match hnuhnung berah West Ham a hmachhawn a, Premier League-a a match hmasa berah hna a thawk ṭha hle. Nat hian Hammers lakah ball kang a tauh chhuak hnem a, City nen erawh a inang dawn lo. 

Pep Guardiola nauten set piece-ah tak ngial pawh ball kang an uar lo a, lei hrula ball inpe kuala tlarhnung ṭhiah chu an nuam tihdan a ni - Reds tlarhnung tan hna a hautak sawt dawn a, Nat hi a inlan a nih chuan a fimkhur lehzual a ngai ang. 

Reds-in an match hnuhnung berah Atalanta 5-0 ngawtin an sawp a, Roberto Firmino aia bul ṭantir Diogo Jota chuan hattrick a siam - Klopp hian Jota bawk a rin nawn ringtu an tam a, German coach erawhin, "Buaina tur a awm lo," tiin a sawi tawh. 

Klopp thusawi aṭanga teh chuan Firmino bawkin bul a ṭan a rinawm a, Brazilian striker hian goal khung uar lo mah se ball thiam leh tlan dan thiam bik a nih avangin Mohamed Salah leh Sadio Mane-ten hmun awl an neih theih phah ṭhin. 

Firmino-a khelh chuan central midfield ang deuh thawin a tawlh hnung a, mual vei lamah Mane awmin ding lam aṭang rawn tlan lut turin Salah a awm thung - Salah-a'n Liverpool a zawm hnuah player pathum hian PL leh CL-a City an hmachhawn pariatah bul an ṭan ho vek a, goal 10 an khung. 

Klopp-a'n Firmino pawimawhna a hria a, mahse a match hnuhnung palia goal ruk khungtu Jota en kan ngawt hi a harsa dawn - Jota a luh chuan tlarhmaah khelh dan inang pathum an awm dawn tihna a ni a, Portuguese forward hi a tlan chak avangin 'counter-attacking player' ti pawha sawi a rem. 

Jota-a luh chuan mual vei lam sirah a hun tam zawk a hmang ang a, a laiah Mane awmin Salah chuan a hmun ngai a luah ang. Player tlan chak ṭhah pathum an awm chuan counter-ah an hlauhawm dawn tih a lang chiang a, chu chuan an khingpui fullback-te tlan chhuak tam tur a veng thung. 

City fullback pahnih Kyle Walker leh Joao Cancelo ten tlanchhuah nuam an tihzia chu tlang hriat a ni a, Jota-a luh chuan an talbuai phah thei - hei tak hi City tan lu haina tur a ni a, Pep-a'n training-naah Jota emaw Firmino emaw pawh lut se, an dan theih dan tur a zirtir a rinawm. 

Tun season-a City buaina langsar tak chu tlarhnung a ni a, mahse inelna hrang hranga an match hnuhnung pathumah goal an chhuah loh avangin Pep-a'n buaina a chingfel taah a inngai ang. 

City tlarhnung laiah Ruben Dias leh Aymeric Laporte an inkawp fuh tawh a, Walker leh Cancelo-ten an thlawp ṭhat bawk avangin Liverpool-in he tlarhnung ṭhiah an tum dan tur hi an a châkawm. 

November, 2019-a team pahnih an intawn khan Liverpool-in point kua ngawtin City an tlansan a, Etihad Stadium-ah City tlarhnung insiamṭha mek an paltlang theia an chak a nih chuan point riatin City an tlansan ang. 

Sergio Aguero chu hliam vangin a la inlan theih a rinawm loh a, Gabriel Jesus a dam tawh thung - Raheem Sterling leh Riyad Mahrez chu lut chiang tura ngaih an ni a, Jesus leh Ferran Torres-ah hian lut tur zawk sawi thiam a harsa. 

City erawh a tu zawk zawk pawh lut se Jota-a luh a, Liverpool tlarhma an insiksawi rang angin City tlarhma an insiksawi awlsam a, VVD tel loa tlarhnung phuahchawp Liverpool tan hmachhawn an awlsam dawn lo. 

Pep-a naute hian tlarhmaah season dang an phak lo nia sawi a ni a, mahse an match hnuhnung pathumah goal sarih khungin an lamah a lut lo - Reds tlarhnunga chetsual ching Joe Gomez-a'n tu pawh dinpui se hruaitu dinhmun zawk a chelh thiam a pawimawh ang.