Mumbai Indians-in final an thleng

Indian Premier League-ah league round-a che ṭha ber Mumbai Indians-in qualifier 1-ah Delhi Capitals run 57-in an hneh a, final an lut. Mumbai hian run 200/5 an siam a, Delhi-in run 143/8 chauhin an chhanglet.

Indians-in target ṭha tak an siam theih nan Suryakumar Yadav (51) leh Ishan Kishan (55*) ten half century an siam  ve ve a, bowler ṭha mi Jasprit Bumrah-a'n run 14 chauh pein wicket li a la. Mumbai Indians-in final an thlen theih nan Indian player pathum an che ṭha hle.

Qualifier 1 khelh hmain match hnuhnung 17 aṭangin match 13-ah a um tu zawk an chak a, hemi a nih avang hian Dubai International Stadium-a inkhelah ṭhum vawra vannei Delhi captain Shreyas Iyer-a'n vawm hmasak a thlang hi a mak lo.

Mumbai opener Quinton de Kock-a'n ball 25 lekah run 40 a siam a, captain Rohit Sharma erawh ball khat lekah a thi thung. Suryakumar Yadav (51) leh Ishan Kishan (55*) te an thawh hlawk a, Kieron Pollard (0) chet fuh loh niah Hardik Pandya-a'n ball 14 lekah run 37 a siam.

Delhi bowler Ravinchandran Ashwin-a'n run 29 pein wicket thum la mah se Mumbai squad ṭhat rualna a lang a, run 200/5 siamin chak turin an dinhmun  a ṭha hle.

Mumbai bowler Trent Boult leh Bumrah ten Delhi tana bat hmasa pathum Prithvi Shaw, Shikhar Dhawan leh Ajinkya Rahane te run siam loin an vawm hlum. Boult hian over hnih lek vawmin run kua a pe a, wicket hnih a lak bawk avangin Bumrah (14/4) nen an chakna kawngah an che ṭha hle.

Delhi-in run 143/8 an siam theih nan Marcus Stoinis (65)  leh Axar Patel (42) te an che ṭha a, Mumbai target siam erawh run 57 tehmeuhin an pha lo. Capitals tan final kawng a la inhawng a, November 8, Pathianni zan hian Royal Challengers Bangalore leh Sunrisers Hyderabad inkhela chak zawk an hneh theih chuan Mumbai laka phuba lakna hun an nei thei ang.