Premier League hmahruaitu Arsenal

Arsenal-in Premier League hmahruaitu nichungin kum thar an chuang kai a, kum 2016-a an match hmasa berah Arsene Wenger-a hoten Emirates Stadium-ah Newcastle United chu 1-0 a hnehin Krismas laia hmahruaitu Leicester City nena an inthlauhna chu point hnih a ni.

Inrinni zan inkhelah Leicester leh Bournemouth goal awm loin an inhnehtawk a, Claudio Ranieri hoten match thum a zawnin chak hmel an hmu ta lo. Hetihlai hian champion nomawi inelna kawnga Gunners elpui bera ngaih Manchester City chuan Watford lakah goal chhuah hmasa zet mah se club lian zia chhuahin an lehthal.

Gunners kalkawng

Krismas zawha an Premier League match hmasa berah Arsenal-in Southampton 4-0 in an hneh lo a, Krismas tuka Liverpool laka tlawm hmahruaitu Leicester City lehpel theihna hun ṭha an neih chu an bawh pelh.

Mahse, Arsenal an insiamṭha thuai a, December 28-ah Bournemouth 2-0 a hnehin Inrinni zan khan Newcastle United chu 1-0 in an hneh leh bawk a, Premier League table chung ber an luah ta.

Manchester United defender hlui Rio Ferdinand chuan, "Arsenal hi tun season-ah an champion lo a nih chuan vuak hrep tlak an ni ang. Tun anga hun ṭha hi an nei leh tawh lo ang," tiin club lian dang chet chhiat laia che ṭha Arsenal chu Premier League nomawi chawi tura an dinhmun a ṭhat thu a sawi.

Arsenal boss Arsene Wenger chuan, "Krismas zawh hnuah match li kan khel a, point kua kan hlawh chhuak thei a ni. Southampton laka kan tlawm avangin Krismas vuakveta kan khelh dan kha 75% in a ṭha e kan ti thei ang," tiin hmahruaitu ni mah se a duhthusam a nih loh thu a sawi.

French manager chuan January transfer-ah player an thlithlai tur thu a sawi a, tun hnaiah player dawr erawh an neih loh thu a sawi.

Pahnihna Leicester

Krismas laiin beisei aia result Leicester City-in Premier League-ah hma an hruai a, kum thar kan chuankai meuh chuan pahnihna dinhmun an luah tawh thung.

Foxes hian Liverpool chu December 26 khan khualmualah 1-0 in an hneh lo a, Manchester City leh Bournemouth chu goal awm lo ve vein an inhnehtawkpui bawk.

Leicester manager Claudio Ranieri chuan, "Match thum chhung chu goal kan khung ta lo. Engkim a kaltluan hunlai a awm a, tunah erawh buaina engemaw tak chu kan nei a ni," tiin insiamṭhat an mamawh thu a sawi.

Foxes hian Cherries an draw ṭum hian chak theihna hun ṭha a nei a, Bournemouth defender Simon Francis chuan minute 57-naah red card a hmu a, Riyad Mahrez-a'n penalty a hlah bawk. Leicester-in kum 2014 chhungin club ṭha zia an lantir a, kum 2015-a an bul ṭan dan erawh champion zia a ni lo.

City an kal zel

Manchester City pawhin Premier League title an beiseina an chhem nung ve zel a, Krismas zawha league match vawi thum an khelhah vawi hnih chakin vawi khat an khingpuite an inhnehtawkpui.

Manchester City hian Sunderland chu December 26 khan 4-1 in an sawp a, Leicester nen goal awm loin an inhnehtawk zui. Inrinni zan khan Watford chu 2-1 in an hneh leh a, hmahruaitu Arsenal aia an hniamna chu point thum chauh a ni. Manuel Pellegrini hoten champion an duh tih a chiang a, nomawi chawi turin player an nei ṭha tawk bawk.

Watford laka goal an chhuah hnua an lehthalna goal khungtute hi Yaya Toure leh Sergio Aguero te an ni a, anni pahnih khawvel club ṭha dang pawhin an awh em em an ni. City-in an squad neih chhah an chak pui a, player manto Kevin de Bruyne leh Raheem Sterling te khel ṭha tawk lo mah se hnehna an chang tho.

Manchester City manager Manuel Pellegrini chuan, "He team hian tumna ropui tak kan nei a, kan beidawng ve ngai lo tih hi vawi tam ka lo sawi tawh ṭhin," tiin a sawi.