Klopp-a hnuaiah Liverpool an vul thei lo

Liverpool-in manager Brendan Rodgers a hnuaiah 3-0 in West Ham an hneh lo a, beiseina sang tak nena an thlir an manager thar Jurgen Klopp-a hnuaiah hmaah an sawn hret a, Hammers khelmualah 2-0 in an hneh lo.

Hammers tan Michail Antonio chuan goal hmahruai a khung bakah Andy Carroll chuan a club hlui Reds lamah hian goal khat a khung ve bawk.

Liverpool-in German coach Jurgen Klopp-a hnuaiah match 18 an khel tawh a, vawi kua chakin vawi nga an khingpuite an inhnehtawkpui a, vawi li an tlawm thung.

Reds hian Krismas zawh lamah match thum khelin vawi hnih an chak a, vawi khat an chak lo. December 26 khan hmahruaitu Leicester chu 1-0 in an hneh a, kum hlui thlahni khan Sunderland chu 1-0 in an hneh bawk.

Mahse, Liverpool hian Krismas hma lawk khan Premier League kaithar Watford chu 3-0 a an lo hneh tawh loh bawk avangin Hammers laka an tlawm leh kher hi fan-te'n an ngai thiam thei lo a, Borussia Dortmund boss hlui Klopp sawiselna hial a ri ta.

Liverpool manager Jurgen Klopp chuan West Ham laka an tlawm hnuah, "Zanin hi lungawi loh hun a ni satliah mai lo a, thinrim ngawih ngawih hun a ni. Ka thinrim em emna chu tun aia ṭha zawka khel thei kha kan nih vang a ni. Eng nge kan tih theih sawi ka tum lo - a chhan chu engmah kan tih miau loh avangin. Kan theihna zawng zawngin kan khel lo a, 95% chauha i khelh chuan awmzia a awm lo. Keima thiam loh a ni," tiin a lungawi lo hle.

Reds hian Premier League-ah pariatna dinhmun an luah mek a, an league match hnuhnung parukah vawi thum lai an chak lo.