Jeje leh Lianzuala ten India an mawi

2015 SAFF Championship final chu nizan khan Trivandrum International Stadium-ah India leh Afghanistan ten final an khel a, result kan hre hman lo. Chutihrualin India final thlen nan Jeje Lalpekhlua leh Lallianzuala Chhangte-te an che ṭha a, Krismas vuakvetah India media ten Mizo player-te chanchin hi a ṭha zawngin an ziak nasa hle.

Thlirna Tawi

SAFF Suzuki Cup 2015 hi South Asia ramte tana inelna a ni a, tun ṭumah hian Group A-ah India, Sri Lanka leh Nepal te awmin Group B-ah Afghanistan, Maldives, Bangladesh leh Bhutan te an awm.

India hian group stage-ah Sri Lanka (2-0) leh Nepal (4-1) an hneh a, semifinal-ah Group B runners up Maldives an hneh leh bawk. Final-a India hmachhawn Afghanistan hian group stage-ah Bangladesh (4-0), Bhutan (3-0) leh Maldives (4-1) te an hneh thung.

Lianzuala boruak

India-in Sri Lanka an hneh ṭumin Lunglei rawlthar Lallianzuala Chhangte chuan goal hnih khungtu Robin Singh a rawn thlak a, 6th August 1997-a piang Lianzuala hi India tana khel naupang ber tiin phai lam media-in an vawrh darh nasa hle.

Nepal an khelh ṭumin DSK Shiva-jians Academy forward Lianzuala chu second half ṭantirhah a rawn lut a, a goal khung tur goalline aṭanga an dah hram hnuah goal ropui pahnih a khung. Lianzuala goal hmasa zawk hi Lionel Messi goal khung atana mawi a ni a, Nepal defender bum tura a step over hnuah a pet kual lut nalh hle. Goal hnihna erawh a Lunglei rawlthar hian a lu hmangin a khung thung a, 2014 FIFA World Cup-a Netherlands captain Robin van Persie goal ropui tak aia a mawi lohna a awm bik chuang lo.

Lianzuala goal hian kum 1995-a India tana goal khung naupang ber Bhaichung Bhutia record siam a khum niin an tarlang a, a goal a mawi bawk avangin a lar chak hle. Amaherawhchu November 5, 2004 khan Khawlailung rawlthar 25th December 1987-a piang Jerry Zirsanga chuan Kuwait lamah India tan a lo khung tawh a, India ramin record a neih ṭhat loh avangin hriat a hlawh lo. SAFF Cup-a Lianzuala chet ṭhat zarah Jerry record hriat chhuahin a awm a, Mizo hming a ṭha takzet.

Goal khung thei Jeje-a

Group stage lamah I League-a Mohun Bagan champion puitu leh ISL-a Chennayin champion puitu Jeje Lalpekhlua a langsar tawk lo. Semifinal-ah player ṭha bik danglamna Hnahthial tlangval Jeje Lalpekhlua'n a rawn lantir a, Maldives 3-2 a an hneh
ṭumin goal hnih a khung.

India forward Jeje-a a hunah a tak a rah ṭhin a, a hnungzui thei tur Lianzuala a awm ta bawk. SAFF Suzuki Cup 2015-ah hian India team-ah Mizo pathum an awm a, Lengpui tlangval Lalchhuanmawia erawh khelmual chhungah a hmel kan la hmu lo.