Barca an chelh Hmahruaitu thar Atletico Madrid

Inrinni zan khan La Liga champion lai Barcelona-in kum 2016-a an match hmasa berah Espanyol nen goal awm loin an inhnehtawk a, sikhat faia Levante hnehtu Atletico Madrid chu hmahruaitu an ni.

FIFA Club World Cup champion zo hlim Catalan club hian kum 2015 khar nan December 31 khan Real Betis chu 4-0 in an sawp a, Luis Suarez-a'n goal hnih a khung bakah Neymar leh captain Andres Iniesta ten goal khat ve ve an thawh ve bawk.

Luis Enrique enkawl Barcelona hian nikum chhung khan inelna hrang hrangah goal 180 khungin champion nomawi panga ngawt an chawi. Amah-erawhchu, Barca hian kumina an match hmasa berah an khel a, Lionel Messi, Suarez leh Neymar te an chhawr thei nachungin goal an khung thei lo.

Barcelonian Derby-ah hian Barcelona-in ball possesion 72% ngawt chang mah se Espanyol keeper Pau Lopez tan hna an siamsak tam thei lo. Messi-a'n yard 25 aṭanga freekick ṭha tak a pet leh Suarez-a'n goal ban a pet per bak sawi zui tur an nei lo. Second half ṭan tirah Liverpool striker hlui Suarez goal khung chu offside vanga pawm a ni lo bawk.

Barca hian league-ah goal khung loh an nei khat hle a, kum 2015 January 21-a Malaga nen goal awm loa an inhnehtawk hnua goal an khung loh lehna hmasa ber a ni.

Barca boss Luis Enrique chuan, "Player ten an theihna zawng zawng senga min hmachhawn a nih chuan goal khung a harsa ṭhin a ni. Espanyol hi team ṭha an ni a, hmachhawn an hautak dawn tih kan hria a, kan hriat ang ngeiin a harsa hle. Second half ṭan tirah kan khel ṭha a, mah se point thum hlawhchhuak turin kan vannei tawk lo. Chutihrualin kan khingpuite khan point hmuh phu khawpin an khel ṭha a ni," tiin Espanyol a fak tel zauh.

Croatia midfielder Ivan Rakitic chuan, "Barca nih vanga point thum hmuh reng theih a ni bik lo a, a chang chuan ball hi goal-ah a lut duh miah lo emaw tih mai tur hian a awm ṭhin. Tunah hian hmahruaitu ni rih lo mah ila kan dinhmun hi a la chhe lo. Hma kan sawn zel dawn tih ka chiang," a ti.

Hmahruaitu Atletico

Barcelona-in point hnih an hloh chhawr ṭangkaiin Atletico Madrid chu table hmahruaitu an ni. Match 18 khelh tawh aṭanga point 41 hmuin hmahruaitu an ni a, an hnuai chiahah Catalan club hi awmin match 17 khelh tawh aṭangin point 39 an hmu thung.

Vicente Calderon sta-dium-a inkhelah Atletico-in goal khung an harsat ve hle a, Koke-a'n yard 20-a hla aṭangin goal bar a pet per bak goal zawnah an pet bik lo. Mahse, Atletico tan minute 81-naah substitute Thomas Partey chuan inkhela goal awmchhun a khung a ni.

Kum 2015 December 30 zan khan Atletico Madrid hian Rayo chu 2-0 in an lo hneh tawh bawk.

2013-14 season-a Atletico champion puitu manager Diego Simeone chuan, "Minute 73-a Thomas a rawn luh chiah khan inkhel hmelhmang a danglam a, player dangte an phur thar bakah kan goal nawr a na sawt. A tawpah kan duh leh beisei ang ngeiin goal kan hlawhchhuak a, kan goal kan venghim bawk. Hmahruaitu kan ni thei hi a lawmawm em em a, chutihrualin kan dinhmun hi a
ṭha tawk lo," tiin hmahruai-tu an nihna chu chhuhsak mai theih an nih a hai lo hle.

Nizan khan Real Madrid leh Gary Neville enkawl Valencia an inhmachhawn a, Rafael Benitez a naute hian point thum an hlawhchhuak a nih chuan Barce-lona nen an point hmuh zat a inang thei ang.