Lajong-ah Foreign player pahnih

India rama football club-te inelna sang ber I League chu January 9 aṭangin khelh ṭan a ni dawn a, Indian club-te'n nomawi chawi ngei tumin transfer bazar a lun hle.

North East aṭanga I League khel hmasa ber club Shillong Lajong pawhin an squad thuam chak nan Brazilian striker Fabio Pena Henrique leh Japanese defender Yusuke Yamagata-te an la lut.

Kum 25-a upa Fabio hian Japanese second division club Roasso Kumamoto-ah season nga chhung chu a hun a lo hmang tawh a, kum 29-a upa Yamagata hian Lajong a zawm hmain Laos club Lane Xang Intra tan a khel thung.

Lajong coach Thang-boi Singto chuan, "Fabio hi player thiam leh chak ṭha a ni a, ball kangah phei chuan kan chhawr ṭangkai khawp ang. Yusuke hi Japan rama hun engemaw chen a khelh hnua Cambodia leh Laos-a lo inkhel tawh a ni a, kan tlarhnung tan a ṭangkai ang," tiin a player thar pahnih chungchang a sawi.