AFC Cup-a inlan tur Bengaluru FC

Federation Cup champion Bengaluru FC chu Asia rama football inelna sang ber dawttu AFC Cup-ah Group H-ah an awm dawn a, Laos Toyota FC (Laos), Ayeyawady FC (Myanma) leh Pahang FA (Malaysia) emaw Johor Darul FC( Malaysia)-te nen an awmho ang.

Johor Darul FC hi AFC Cup bakah Malaysia Super League champion lai an nih avangin AFC Champions League playoff an khel dawn a, Champions League-ah hian an in pet kai thei lo a nih chuan AFC Cup Group H-ah hian an tla thla leh ang.

AFC Champions League an in petkai a nih erawh chuan Malaysia Super League-a pathumna Pahang FA hian an ai awh dawn a ni. MSL-a pakhatna leh pahnihna hian AFC Cup an khel ṭhin.

Bengaluru FC-ah hian Mizo player panga lai an awm a, goalkeeper Lalthuammawia Ralte, defender Lalchhuan-mawia leh midfielder Bei-khokhei Beingaichho-te lo awm sa tawhin tun season-ah midfielder Malsawmzuala leh striker Daniel Lalhlimpuia-te an lut ve leh a ni.

Hetihlai hian Mohun Bagan chuan January 27 khian AFC Champions League play-off round one-ah Singapore League pahnihna Tampines Rovers an hmachhawn dawn a, he inkhela chak zawk zawk hian Round 2-ah Chinese Super League club ṭha Shandong Luneng FC an hmachhawn ve leh bawk ang.