Premier League thlasik transfer a inhawng ta
January 2, Inrinni khan thlasik transfer hawn a ni a, February 1 thleng club-te'n an duhzawng player lakluhna hun an nei ang.
Premier League club-te'n tun hnai season hnih chhung chu thlasik transfer-ah pound maktaduai 130 vel ve ve an seng a, 2011 January transfer-a Premier League club-te sen zat record ding lai pound maktaduai 225 erawh an la phak lo hle.
Tun thlengin player langsar lut chhuak an la awm lo a, thuthang leng vel erawh ṭum dang ang bawkin a tam leh hle. Premier League club liante an la che chhuak lo a, club tenau erawh transfer inhawn ruala chanchinthar nei nghal an awm nual.
Beisei loh lamah Iturbe
Premier League transfer-ah beisei loh thil thleng hriat tur a awm nghal a, Bournemouth chuan Argentine striker beiseiawm Juan Iturbe chu season tawp thleng atan loan-in AS Roma aṭangin an la lut.
Bournemouth hian an duh a nih chuan kum 22-a upa winger hi season tawpah a nghetin an la lut thei ang. Iturbe hian July 2014 khan Roma hi kum nga cham turin a zawm a, Verona aṭanga Roma a panna zat hi pound maktaduai 17.4 lai a ni.
Hetihlai hian Bournemouth chuan Chelsea aṭanga loan-a an hawh Christian Atsu an hawh theih hun chhung chu an pawt tawi a, Stamford Bridge lamin an player hi an ko let niin an sawi.
Everton-ah defender beiseiawm
Everton chuan League One club FC Bury aṭangin defender beiseiawm Matthew Foulds an la lut. Kum 17-a upa defender hi Bury Academy chhuak niin nikum February khan a professional contract hmasa ber a ziak a, cup competition-ah a club tan hian vawi hnih a inlan ve tawh. Matthew Foulds man zat hi puanzar a ni lo.
Leicester winger thar Gray
Tun season-a beisei phak baka che ṭha Leicester-in khelmual pawn lamah pawh an chet ṭhat an chhawm nung zel. Foxes hian pound maktaduai 3.7 man Birmingham winger Demarai Gray chu an la lut a ni.
Kum 19-a upa winger hi Leicester hian nikum August khan lakluh tumin an lo hlawhchham tawh a, Bournemouth pawhin lakluh an lo tum ve tawh bawk. Birmingham Academy chhuak Gray hian senior team tan match 78 khel tawhin goal riat a khung a, Birmingham lamah hian season tawp thleng atan loan-in a chhuak lehnghal dawn nia sawi a ni.
Watford-ah Ighalo a nghet
Kum 2015 chhunga English football league-a goal khung hnem ber Watford striker Odion Ighalo chuan Vicarage Road (Watford khelmual) chu chhuahsan tumna a neih loh thu a sawi.
Ighalo hian nikum khan league goal 30 ngawt a khung a, English football-a league hrang hrangah nikum chhung khan ani aia goal khung hnem an awm lo.
Atletico Madrid nena sawi zawm hlawh mek striker chuan, "Watford nen ṭha taka ka season hman zawh ka duh a, ṭha taka season khar i tum tlat chuan transfer thuthangin a tibuai miah lo ang che," tiin a rilru chu Watford-ah chauh a awm thu a sawi.
Swansea tana inhawng De Boer
Swansea City nena sawi zawm hlawh mek Ajax coach Frank de Boer chuan Welsh club nen indawrna engmah an la neih loh thu a sawi a, Swansea chuan an sawm a nih erawh chuan a inngaihtuah tur thu a sawi.
Kum 45-a upa manager chuan, "A pawimawh hmasa ber chu club-in eng ruahmanna nge an neih a, club chhungkuaa ami ten eng nge tih an tum? tih hi a ni. Swansea City nen sawi zawm mek ka ni a, mah se indawrna engmah kan nei lo," a ti.
Netherlands captain hlui De Boer chuan Welsh club nen indawrna nei lo mah se a zawm hreh loh thu sawi nghalin, "Club nen indawrna engmah nei lo mah ila chona phurawm tak min pek theih chuan ka zawm hreh lo. Tottenham leh Liverpool-te ang club thil ropui tak tih theih ka inbeiseina hmuna kal ka duh a, chutiang ang chona min pe thei chu ka duh a ni," tiin chona thar hmachhawn a châk thu a sawi.