Mizoram panin German team lo chhuak ta
German Students National Football Team chuan nimin khan Germany chhuahsanin India ram an rawn pan. Lammuala Mizoram XI nena inkhel tur German team hi Germany-a football thuneitu sang ber Deutscher Fussball-Bund (DFB) tirh an ni a, an jersey hak tur hi German national team jersey a ni ang - Germany youth team tana khel tawh player paruk an awm
January 6 hi football ngainatute tan chuan hun bik a ni a, thleng fo atana duhawm a thlen nawn leh rinawm si lo a ni. Lammualah hian Mizoram XI leh Bundesliga club Hoffenheim te May 2014 khan an lo inkhel tawh a, Nilaini tlai dar 3:30 hian Mizoram XI leh German Students National Football Team an inkhel leh ang.
Mizoram Football Association-in friendly match pawimawh bik buaipui turin committee hran a siam a, German team thleng turin an inpeih tawh. Ticket hi Rs 500 leh Rs 200 mante niin January 4-5 hian Sikulpuikawn, Treasury Square, Millenium Centre Kawt leh Chanmari Kawnah lei theih a ni ang a, inkhelh niah zawrh chhuah tum a ni lo. Mi 200 tan chiah Rs 2000 siam a ni bawk a, he mi bik hi chu MFA Office, City park-ah vawiin dar 11 atangin leih theih a ni ang.
Mizote tan Lammual a lian tawk lo a, entu innek buai pumpelh nan ticket siam tam a nih loh bawk avangin inkhel en tum tan chuan a hma lama ticket neih chu pawimawh hmasa ber a ni.
German team chu
India rama German team hi German Ministry of Foreign Affairs pawmpuina thlapa German Football Association (DFB) rawn tirh an ni a, All India Football Federation in a hriatpui an rawn zin tur hi a hriatpui bawk.
Germany hian an hnam zia leh an football thiamna chu khawvel hrang hranga darh zel turin an duh a, tun hmain Africa leh South America khawlmualpuiah ram eng emawzat an tlawh tawh. Tun ṭumah hian India ram khawpui pali Delhi, Aizawl, Kolkata leh Bangalore-te an tlawh dawn a, vawi hnih an inkhel ang. Aizawl hi January 5-ah an rawn thleng ang a, Mizoram XI nen January 6-a friendly match an khelh bakah January 11 hian Bengaluru-ah Ozone FC an hmachhawn bawk ang.
German player-te hi professional leh semi-professional footballer-te an ni hlawm a, football hmanga eizawng pahin zirna an tlahthlam lo a, University zirlai an ni. Chutihrualin player-te hi an naupang tihna erawh a ni lo, German player-te hi kum chawhrualin kum 26 leh thla riata upa an ni.
German Students National Football Team-ah hian player 17 an awm a, Germany youth team tana khel tawh player paruk an awm a, an ṭha dawn tih a chiang. German player-te hi khawvel huapin langsar lo mah se Germany-ah erawh player hriat hlawh an awm nual a, chung zingah chuan Steffen Wohlfarth a tel.
German forward Wohlfarth hi tun season-a Bundesliga club FC Ingolstadt 04 tan match 132 zet a khel tawh a, goal 28 a khung sak. Kum 32-a upa striker hi Bundesliga club SC Freiburg youth system chhuak a ni a, Bayern Munich II tante pawh a khel tawh.
Eng nge an sawi?
German Football Associations (DFB)-a Director for Coaching and International Relations hna chelh mek Markus Weidner chuan, "Kum 2016 hi ṭha taka bul ṭan kan duh a, football ngaihnatna state Mizoram khawpui Aizawl a friendly match kan nei tur hi kan châk tawh takzet a ni. India rama friendly match pahnih kan neih tur hi kan ngai pawimawh, inkhelh bakah hian khawpui palia hnuchham in te kan tlawh dawn a, hei hi India ram kan tlawh chhan a ni tel bawk," a ti.
German Students National Team's head coach Marcus Jung chuan, "Africa leh South America te kan tlawh tawh a, tun ṭuma India rama kan inkhel tur hi kan lawm hle a ni. India ramah cricket leh hockey an ngaina a, amaherawhchu Indian Super League-in football-a India hmel hmang a thlak a, player leh coach lar Zico, Roberto Carlos, Marco Materazzi, David Platt leh Nicolas Anelka te an chah lut thei a, football-ah eng ang chiaha ṭha nge tih hi ka hre châk tawh a ni. May 2014 khan 1899 Hoffenheim-in India ram an rawn tlawh tawh a, Mizoram XI 3-0 in an hneh a, keini pawhin result ṭha tak neih kan tum ang," tiin ṭha taka khelh an tum thu a sawi.
German Students National Team-a an Head of Delegation Lutz Hermann Hangartner chuan, "Duthusam inpuahchahna nei lo mah se kan team tirhte hi an ṭha tawk a, an zin tawhnaah hlawhtling takin an khel zel. Germany ram pawna kan team hian hna ṭha tak an thawk a ni," tiin a sawi. Lutz Hermann hi Association of German Football Coaches-a president hna chelh lai a ni a, German football coach zinga a hruaitu ni phak a ni.
Matchday Ticket
En Man : Rs 2000, Rs 500 leh Rs 200
Zawrh chhuahna hmun : Sikulpuikawn, Treasury Square, Millenium Centre Kawt leh Chanmari Kawn
* Ticket hi vawiin bakah January 5 hian zawrhchhuah tum a ni.
* Rs 2000 neite tan January 6 zanah German team chaw ei pui theih a ni.