Kum bul ṭan ṭha United

Manchester United-in December thlaah match ruk an khel a, chak an nei lo. Louis van Gaal-a hote hi German club Wolfsburg an hneh loh vanga Champions League aṭanga an tlak hnuah match thum a zawnin Premier League-ah an chak lo zui a, Dutch manager aiah Jose Mourinho lut tur ang hiala sawi hman a ni.

Media lam thu zawh duh dana lungawi lo Van Gaal chu press conference aṭangin a chhuak tau hial a, amaherawhchu United result chhiat ber lai hian club hotu lam chuan Dutch manager chungah rinna an nghat a, supporter zingah erawh ban duhtu an tam hle.

Pressure san lai takin United-in Old Trafford-ah Chelsea an mikhual a, goal awm loin inhnehtawk mah se an khel a nung. Kum 2016-ah United-in result ṭha an nei ta a, Van Gaal-a hnuaiah a vawi khatna atan Swansea chu 2-1 in an hneh. Table hnuai lama awm hneh hi club lian tan lawmna tur a ni lo a, United tan erawh harhtharna thlen theitu a nih avangin a hlu takzet.

United tan Anthony Martial leh Wayne Rooney ten goal an khung a, amaherawhchu Red Devils goal hnih inkara Gylfi Sigurdsson-a'n Swansea tana goal a khung avangin mualneitu an talbuai hle. Ṭum dang ang thoin Spanish keeper David de Gea a che ṭha a, United-in point thum an hlawh chhuak hram.

United captain Rooney goal hi Premier League bika a goal 188-na a ni a, goal khung tam ber record chelhtu Alan Shearer chu goal 72 in a pha lo. Manchester United tan Rooney hian goal 238 a khung tawh bawk a, goal 11-in Sir Bobby Charlton a record a la pha lo bawk.

Manchester United manager Louis van Gaal chuan, "Pressure nasa tak kan neih hnua hnehna kan chan theih avangin ka lawm takzet a ni. Tuna kan chakna hi kan bul
ṭanna chauh ni se, kum tharah result ṭha zawkin a chhunzawm ka beisei," tiin a sawi.