Qatar-ah Djokovic inlan dawn

Chawlhkar ruk chhung chawlh a hman hnuah Novak Djokovic chuan kumina a tournament hmasa ber atan Qatar Open-ah a inlan dawn. He inelna hi January 4-9 chhunga neih tur niin hard court-a khelh tur a nih avangin January 18 aṭanga khelh ṭan tur Australian Open inbuatsaihna a ni nghal ang.

World number 1 Djokovic hian nikum khan tuma el phak lohin mipa tennis-ah ro a rel a, Grand Slam pathumah a champion a ni. Qatar Open-ah hian champion lai David Ferrer bakah player langsar dang Rafael Nadal leh Tomas Berdych te pawh an inlan dawn a ni.

Kum 28-a upa Djokovic chuan, "Season bul kan ṭan leh dawn a, nikum ang bawka ṭha a ka khelh leh theih ngei ka beisei," tiin beiseina a nei sang hle.