Goal 200 khung thei Harry Kane

Harry Kane chuan Tottenham Hotspur tan goal 200 a khung tling ta, English striker hian hetiang zat goal khung tur hian match 300 a mamawh - Spurs chu Ludogorets Razgrad mualah 3-1 in hnehna a chanpui.

Ningani zan Europa League inkhel dangah Arsenal chuan Molde 4-1 a sawpin an dinhmun an sawhnghet ta viau. Premier League club dang Leicester City pawhin Sporting Braga 4-0 in an sawp ve bawk.

Jose Mourinho-a'n a player thlan dan aṭangin Europa League a ngai pawimawh tih a chiang, a neih ṭhat Kane, Gareth Bale leh Lucas Moura ten tlarhma lamah bul an ṭan, forward Son Heung-Min pawh bench aṭangin a lut.

Spurs tan Bulgarian club lakah harsatna a awm lo, striker Kane-a'n minute 13-naah goal khung ṭanin forward Moura chuan chawlhlawk hmain a khung belh bawk. Mualneitu lamin Claudiu Keseru hmangin sut ṭhen ve mah se Giovani lo Celso chuan an goal thumna a khung.

North London club hian Pathianni tlai dar 5:30-ah West Brom an lenchilh zui dawn, EPL pahnihna ni lai hian league lamah pawh result neih ṭhat an tum dawn. Slaven Bilic-a naute hi match sarih khelh tawh china chak la nei lo an ni.

Arsenal boruak a ṭha chhunzawm zel, defender David Luiz inhliam chu dam tawhin inkhel bul a ṭan thei. Player ṭha chhawr lo mah se Gunners tan buaina tur a awm lo, Kristoffer Haugen leh Sheriff Sinyan ten anmahni lama an tih luh bakah Nicolas Pepe leh Joe Willock ten an khung bawk.

Mikel Arteta naute hian Manchester United an hneh hnuah result ṭha an neih chhunzawm a, Pathianni zan dar 12:45 a Aston Villa an mikhual hunah pawh point thum hmuh an beisei ngam ang - Villa lakah chuan an ṭhat dan berin an inrem leh tawh ang.

Europa League inkhel dangah Leicester City chuan Jamie Vardy chu hahchawlhna hun pe mah se goal khung lamah buaina an nei lo. Kelechi Iheanacho goal hnih bakah Dennis Praet leh James Maddison te goal hmangin hnehna an chang.