Palermo Open champion Ferro

Thla nga chhung tennis an khelh theih loh hnuah Palermo Ladies Open khelh chhunzawm a ni a, clay court inelnaah hian Fiona Ferro chuan Anett Kontaveit 6-2, 7-5 a hnehin nomawi a chawi.

Covid-19 vanga tennis an chawlh laikawk hma khan Ferro hian a match hnuhnung 10-ah chak loh a nei lo, inkharkhip a reh hnuah pawh a khelh ṭhat chhawm nung zelin tournament a khelh hmasak berah hlawhtlinna a chang leh nghal.

France nula Ferro hian a ball vauk nat a chhawr ṭangkai hle, winners vawi 51 zet a vaw chhuak thei. A khingpui Kontaveit-i service chu vawi nga ngawt chhuhsak bawkin a chungnung viau a, match point a hmuh vawi hnihnaah a tlang a ni.

Kum 23 mi Ferro chuan, "Hripui leng vangin hun rei tak chhung chu rilru mumal pawh kan nei thei lo, chumi hnuah lawmna boruak a rawn thleng leh ta hi sawifiah thiam pawh a harsa ka ti zawk hle.

"Tournament chhung zawngin hriselna lamah buaina ka nei lo, a bik takin final-ah ka khel ṭha em em a, chutih rualin ka khingpui kha a vanduai ve bawk," a ti. World number 22 Kontaveit hi final a khelh tawh paruk zinga pangaah a chak lo.