Willian-a'n Chelsea a mangṭha

Brazil winger Willian chuan season sarih chhung a chamchilh tawh Chelsea a chhuahsan dawng chiang a, a club thar zawm tur la chiang lo mah se Blues a thlahna thu chu Pathianni zan khan a ziak.

Kum 32 mi Willian hi season kal laiah Chelsea player pawimawh ber zinga mi ni mah se tun hnaiah hliam vangin a buai. FA Cup final leh Champions League an khelh ṭumin a inlan ve thei lo - tunah chuan chona thar hmachhawn hun a tih thu a tarlang a ni.

North London club Arsenal chu Willian lalut tur a thawm nei ring ber an ni a, kar hmasa khan club leh player hian inremna an nei tawh nia sawi a ni. Mahse, Tottenham tana medical test a paltlang hnua Chelsea zawm leh thut tawhtu a nih avangin Gunners a pan ngei dawn tih pawh a la chiang chuang lo.

Frank Lampard-a'n a winger hi chelh a duh a, season hnih daih contract an zawrh. Amaherawhchu, sawmna a dawn hi Willian-a'n a hnawl. Khawthlang media lamin an tarlan dan chuan season thum atan contract ziah a duh a ni.

Twitter lamah thu chhuah siamin Willian chuan, "2013 August thla khan Chelsea aṭangin sawmna ka dawng a, ka tana hmun ṭha a ni tih hriain ka pawm thlap. Hlimna leh lawmna bakah lungngaih chang a awm a, nomawi kan chawite hi a hlu hle.

"Hun a her liam zel a, tunah chuan hmalam panin ka khaw hawi ka thlak a lo hun ta. Blues fans leh ka teammate zawng zawngte ka ngai dawn hle, hlawhtlinna kan chante kha nomawi a teh chhuah theih loh khawpa hlu a ni," a ti.

Russian club Anzhi Makha-chkala aṭanga Chelsea a pan hnuah Willian hian Blues tan match 339 a khelhsak hman. Premier League nomawi pahnih leh Europa League champion a nih pui a, club player of the year chawimawina pawh vawi hnih a dawng.

London club tan a season hmasa berah Premier League match 25 a khel a, a hnu lam season rukah chuan match 30 chuang a khel vek; season hnuhnung berah pawh match 36 a la khelhsak - a dam a nih phawt chuan rinrawl a ni ziah tih a chiang hle.