Best FIFA Award an sem leh dawn ta

Football khawvela mimal chawimawina ngaihhlut hlawh Best FIFA Awards chu semchhuah a ni leh dawn ta a, Ballon d'Or ang thoin lawmman ngaihhlut hlawh ber Best FIFA Men's Player dawng turin Lionel Messi leh Erling Haaland hming a ri ring hle.

Messi hian World Cup-ah Argentina a champion pui avangin sawi a hlawh a, mahse, Best FIFA tehnaah World Cup a tel lo. Haaland hian Manchester City chu treble champion a nihpui - hming chhawpchhuah hi 12 ni mah se player pahnih zinga a tu emaw zawk chu he award dawng tura rin an ni.

Treble champion Manchester City chuan lawmman dawng thei zingah player panga ngawt an thawh a, Ilkay Gundogan pawh Barcelona player ni tawh mah se a lan chhan erawh season hmasaa City tana a hnathawh vang a ni.

Award kalphung

Best FIFA Football Awards 2023 hi December 19, 2022 - August 20, 2023 inkara player-te chet dan aṭanga teh a ni a, FIFA lam chuan World Cup 2022 chu tehnaah a tel loh thu an sawi. Mahse, vote thlaktu lamin point an pek san miau chuan dawn theih erawh a ni lawi si!

FIFA Awards-ah hian national team captain, coach, journalist 300 leh fan ten vote an nei a, category tin vote hian 25% ṭheuh hlutna a nei - October 6 thleng vote hi thlak theih a ni dawn a, FIFA.com lamah fans tan vote thlak tur a ni.

Messi vs Haaland

Lionel Messi buk rit chhan langsar ber chu World Cup a ni - FIFA lamin World Cup an thlir tel loh thu sawi mah se, vote thlaktu lamah Argentina tana World Cup nomawi a chawi hi a tlak nat miau chuan Messi hian award a hawn thei dawn.

City tana treble nomawi chawitu Erling Haaland tan award dawn a awm a, Norwegian striker hian season hman zawh takah khan match 53 khelin goal 52 ngawt a khung a, mimal chawimawina dawn theih ang chu a hui chho zel bawk.

Award dang

Coach ṭha ber ni thei zingah Pep Guardiola a langsar fal nalh a, Spanish coach hian City chu an la champion ngai lohna Champions League-ah nomawi a chawipui a, Premier League leh FA Cup-ah a champion pui bawk - amah hnaih ber tura ngaih chu Luciano Spalletti a ni.

Italy coach ni ta Spallettti hian season hman zawh takah khan Napoli chu Serie A nomawi a chawipui a, kum 33 hnua league nomawi an chawi leh hmasa ber a ni! Barca boss Xavi hming pawh a lang a, mahse, Spanish coach tan La Liga nomawi a chawi chu Best FIFA Awards dawhsan lawnpui nan a tawk zo lo mai thei.