Buaina nei Man United hmaah Brighton

Zanin dar 7:30 hian Manchester United-in old Trafford-ah Brighton & Hove Albion an mikhual dawn. Erik ten Hag-a hote hian tun season-ah an hmelma Arsenal leh Tottenham Hotspur te an hneh tawh lo a, khelmual pawn lamah buaina an neih tel avangin Brighton hneh hi a harsa dawn.

Dutch manager leh Jadon Sancho buaina chinfel a la ni lo a, English winger hi first team training-naah tel loin a hranpain training a nei. Arsenal an hneh loh zawhah Ten Hag-a'n Sancho hi training-naa a chet dan vanga tel lo a nih thu a sawi.

Kum 2021-a pound maktaduai 73-a Borussia Dortmund aṭanga Man United zawmtu Sancho hian ngawih chuh mai loin club chet chhiat chhan chhuanlam atana an hman ṭhin thu a sawi thung. Sancho hian league match 58 a angin goal kua chauh a la khung a, assist vawi ruk chauh a neih bawk avangin insawithiam mah se a che ṭha tawk lo tih chu phat rual a ni lo.

Antony pawhin a bialnu hlui kut a thlak avangin thubuai a nei mek a, loan hmanga Getafe pantu Mason Greenwood pawhin hetiang buaina hi a lo tawk tawh. Khelmual pawn boruak ṭha lo avangin United tlarhma a hriam tur angin a hriam tawk dawn lo.

Season liam ta captain Harry Maguire pawhin diriam a la tawk zel a, club tan a khel tam tawk lo chungin Maguire hi Gareth Southgate-a'n a ko a, Scotland 2-1 a an hneh ṭumin an lamah a ti goal. England coach Southgate pawhin Maguire a thlavang a hauhsak hial.

United defender pawimawh Raphael Varane a la inhliam a, Arsenal an hneh loh ṭumin Lisandro Martinez leh Victor Lindelof te hliam vangin an la chhuak. A tawpah Maguire leh Jonny Evans te an inkawp a ngaih phah. Martinez leh Lindelof te hi an dam hman loh chuan Maguire chungah pawh rinna an nghah a ṭul ang.

Ten Hag-a hote tana chanchin lawmawm erawh Ramus Hojlund a dam tawh a, Denmark striker hi Brighton laka beiseina siamtu tur a ni. Player thar dang Sofyan Amrabat dinhmun hi a la chiang lo a; Casemiro leh Cristian Erkisen ten tlarhnung an thlawp a rinawm.

Brighton hi tun dinhmuna Premier League club hmuhnawm ber zinga mi an ni a, match hnuhnung berah Newcastle United 3-1 in an sawp. Rawlthar duhawm Evan Ferguson-a'n Magpies lakah hattrick a siam a, mah se Brighton hi mimal pakhata innghat an ni lo a, team anga khel an ni.