Everton hmachhawn tur Jesus

Pathianni zan dar 9:00-ah Arsenal chuan Premier League khel turin Everton an tlawh dawn - Gunners a zawm hnuah a vawi khat nan Gabriel Jesus chuan Toffees a hmachhawn ve thei dawn ta tihna a ni.

Brazil international Jesus hian season hmasa nipui lai khan Manchester City aṭangin Arsenal hi a zawm, a khup hliam vangin North London club a pan hnuah Everton hi a la hmachhawn leh miah lo.

Gunners manager Mikel Arteta-a'n striker Jesus hi bul a ṭantir tawh a rinawm, tun hma lamin Toffees lakah Jesus hian sulhnu a nei ṭha hle - Man City player a nih lai khan Merseyside club hi a hmachhawn hnuhnung pasarihah goal emaw assist emaw a nei ziah.

Tun season tir lamah pawh Jesus hi khup hliam vang bawkin a buai a, mahse tunah chuan a dam tawh. Gunners tan substitute bench aṭangin a lut thei tawh a, chu bakah an ram Brazil tan World Cup qualifying a khel thei tawh bawk a ni.