Man City-ah Kyle Walker a nghet

England defender Kyle Walker chuan Manchester City tan season hnih daih contract a ziak. Premier League champion tan Walker hian a contract hmasa a hmang zo mek a, chhuak mai tur angin thawm nei mah se Etihad Stadium-ah a cham nghet leh dawn ta zawk a ni.

Kum 33 mi Walker hian Manchester City tan nomawi chi hrang hrang 13 ngawt a chawi tawh a, season ruk chhung hun a hman tawhna hi a chhuahsan hman teuh hle, nipui bazar lai khan Bayern Munich nen na taka sawizawm an ni hman.

Mahse, manager Pep Guardiola-a'n Walker hi chelh a duh a, midfielder Bernardo Silva nen a duh ang ngeiin an chelh. Walker chuan, "Contract thar ka ziak hi ka lawm, ka hma hun chu Manchetser City-ah hian a awm, chu chu ka tan pawh a ṭha.

"Tun hnai kum ruk liam ta kha ka tan chuan a hluin a nuam êm êm a, coach ṭha leh ropui bakah teammate ṭha tak tak ka nei. Chhung lam leh pawn lam aṭanga thlawpna ka dawng ṭha êm êm reng bawk," tiin a sawi.

Season hmasa khan Guardiola kaihhruai Man City hian Champions League, Premier League leh FA Cup nomawi an chawi vek a, season chawhnu lama an khelh dan an tih danglam hnuah Walker hian hmun pawimawh a chang meuh lo.

A bik takin Champions League final-ah inkhel bul ṭantu zingah a tel lo, Spanish manager chuan a naute a khelhtir dan tharah Walker hian a duh ang a phak lo niin a sawi a, mahse, Barcelona manager hlui hian tun season-ah chuan a duh angin a hmang thei dawn niin a lang.

Man City director of football Txiki Begiristain chuan, "Kum 2026 thleng atana Kyle nen inremna kan siam thei hi a lawmawm hle. Ka ngaihdan chuan ani hi khawvela right back ṭha ber a ni a, hlawhtlinna kan chan theih nan a thawhhlawk hle a ni," tiin a sawi.

Premier League champion Man City hian zanin dar 7:30 hian London Derby khel turin West Ham an lenchilh ang.