Asia Cup final Pathianni tlaiah India vs Sri Lanka

Asia Cup final-a cricket ngainatute hmuh châk chu India leh Pakistan inkhel a ni a, amaherawhchu Shaheens-in Sri Lanka an hneh loh avangin a thleng dawn ta lo. September 17, Pathianni tlai dar 3:00 hian R. Premadasa Stadium, Colombo-ah Sri Lanka leh India te an inkhel ang.

Nizan khan India hian group match hnuhnung berah Bangladesh an hmachhawn a, eng result pawh thleng se final khel turah nghawng a nei tawh lo. Men in Blue erawh final atana inpuahchahna ṭha a ni thung dawn.

Lions an vannei

September 14, Ningani khan Pakistan leh Sri Lanka an inkhel a, a chak zawkin final an lut dawn. Ruahsur vangin inkhel hi over 50 ni loin over 42-ah pawh tawi a ni.

Pakistan-in vawm hmasak an thlang a, Mohammad Rizwan-a'n thi loa 86 a siam zarah 252 runs an siam. Chutihrualin opener ten bul an ṭan ṭhat tawk loh a pawi a, an target a tam tawk lo.

Bowling lamah Pakistan-in Haris Rauf leh Naseem Shah te awm lo an tuar a, an target hi an hum zo ta lo. Sri Lanka-in bul an ṭan chhe lo a, Kusal Mendis-a'n 91 runs a siam.

Amaherawhchu, over tawp lamah an talbuai a, Pakistan chak thei dinhmunah an ding. Over tawp berah Sri Lanka tan run riat siam a la ngai a, ball thumah run ruk siam a la ngai tihah Zaman Khan-a'n Pramod Maduhsan a vawm hlum.

Mahse, hei hi Lions batter Charith Asalanka-a tan hun ṭha a ni a, bat-na hun remchang a nei chiah. Asalanka hian four runs a vuak chhuah hnuah run hnih siam lehin ball khat pawh dah ban tur a awm lo. Lions-in 252/8 runs an siam a, DLS method hmangin hnehin an chang.

Champion lai Lions

Inelna thlengtu Sri Lanka aiin India buk a rit zawk a, mahse Lions hi champion lai an ni. Nikum Asia Cup final-ah Sri Lanka hian Pakistan an hneh a, mahse hemi ṭum hian inelna hi T20 a ni thung.

Kumina inelna hi ODI hmanga neih a ni a, kum 2018-a ODI hmanga inelna neih ṭumah erawh India an champion. ODI hi over 50-a khelh a ni a, over a tam hian team ṭha zawk tan chakna chance a sang.

Tun hi batting leh bowling-ah India cricket team ṭhat vanglai a ni a, Sri Lanka erawh an hniam lai a ni thung. Hemi a nih avang hian India hi dinhmun ṭha zawk tura ngaih a ni.

Super 4-ah India hian Sri Lanka hi 41 runs-in a hneh tawh a, hun pawimawhah Men in Blue an chesual leh ang em tih hi zawhna chu a ni. Tun ṭum inkhel hi Asia Cup ringawt a ni lo a, Ocotber thlaa khelh ṭan tur World Cup atana inpuahchahna a nih avangin ngaihven a hlawh hle.

Batting lamah Rohit Sharma, Shubman Gill, Virat Kohli, Ishan Kishan leh KL Rahul te an pawimawh dawn a, an chesual a nih chuan all rounder Ravindra Jadeja a pawimawh leh dawn. Bowling lamah Jasprit Bumrah leh Kuldeep Yadav te chu team inngahna an ni.