Everton an hralh dawn ta
Premier League club talbuai Everton chu 777 Partners chuan an lei dawn ta a, Merseyside club neitu Farhad Moshiri chuan Everton-a a stake 94% chu American investment firm hi a leitir dawn a ni - league match li khelh tawhah point khat chiah la hmu Everton fan-te an phur khawp ang.
Hetihrual hian a neitu lam an inrem vang ringawtin club hralhna hi chak taka kalpui nghal theih a ni bik lo a, 777 Partners te hian kum 2023 tawp lamah chuan an duh angin Everton hi an lei fel hman a rinawm.
Premier League club hi a neitu leh a leitu turte inrem vang ringawta hralh mai theih a ni lo bawk - Premier League, Football Association leh Financial Conduct Authority ten zirchiangin, an pawm ve leh phawt a ngai dawn a ni.
Moshiri chuan thuchhuah siamin, "Kum sarih liam taa Everton-a ka sum leh pai te ka sen ve aṭang khan, top football club-a sum hman dan leh kalphung hi nasa takin a danglam tawh a ni," a ti a, club lian tak takte chu a bik takin private equity firm, specialist sports investor leh sorkar thawhpui company langsarten an neih nasat tawh thu a sawi bawk.
777 dintu Josh Wander chuan, "Everton club chhungkuaa kan tel ve thei hi kan lawm a, he club hmasawnna tura hma kan la ve thei tur hi kan tan chuan chawimawina a ni," a ti a, khelmual leh pawn lam sumdawnnaa theihtawp an chhuah tur thu a sawi tel bawk - Everton hian league match li khelh tawhah point khat chiah an la nei.
Everton hi kum 2016 khan Farhad Moshiri chuan leiin, hma pawh a la nasa hle. British-Iranian sumdawng hausa hian Merseyside club hi siam len tumin pound maktaduai 750 zet a seng tawh a, mahse, an sum senin result ṭha a ken tel loh avangin club a enkawl danah fan-te an lawm lo.
Tun hnai season hnihah Championship lama relegate thei dinhmunah an ding hman a, fan-ten Moshiri leh club board te chu an club chhuahsan turin an ngen hial.
Toffees (Everton sawina) chief executive Denise Barrett-Baxendale, chief finance & strategy officer Grant Ingles leh non-executive director Graeme Sharp te chuan club hi an chhuahsan phah hial a, chairman Bill Kenwright erawh a cham chhunzawm.
March thla khan Everton hian a zawna kum nga nan sum an hloh thu an tarlang a, hetih chhunga an sum hloh zat hi pound maktaduai 430 a tling hial. Hetihrual hian stadium thar tur an ruahman mek bawk a, £760mtd vel seng turah an inngai.
777 Partners hi infiamna lamah an inhmang nasa hle. Brazilian club Vasco de Gama, Belgian club lar Standard Liege leh German second division club Hertha Berlin-ah te share neiin, mahse, fan-ten an duh lohna an lantir nasa viau ṭhin.
Kum 2021 khan British Basketball League-ah 45% stake an lei a, he league club zinga mi London Lions neitu an ni bawk. La Liga club Sevilla-ah pawh share an nei a, Everton an lei tak avangin Premier League club 20 zinga 10 chu American sumdawng hausa ta a ni tihna a ni.