Liverpool dinhmun a chiang lo

Premier League match thum zet a zawna chak tawh Liverpool chuan vawiin tlai dar 5:00 hian league match khel turin Wolverhampton Wanderers an lenchilh dawn a, mahse, hliam vangin Reds hi an talbuai mek.

Tun hnaiah Trent Alexander-Arnold, Thiago Alcantara, Darwin Nunez, Alexis Mac Allister, Stefan Bajcetic leh Luis Diaz ten club training an zawm lo vek a, Liverpool fan-ten an player zinga training zawm lo an tam chu a chhan an hre châk.

Mac Allister, Bajcetic leh Diaz te chu international break-ah ram tan an fehchhuah chauh avangin training an zawm lawk lo nia sawi a ni a, player pathum hi coach Jurgen Klopp-a'n ṭul a ti a nih chuan an inlan thei tura ngaih a ni.

Trent Alexander-Arnold pawh international break-ah hliam vangin England squad a zawm thei lo. Liverpool right back hi an league match hnuhnung berah a khel ṭha takzet a, mahse, he thu buatsaih a nih thleng hi chuan a hranpain training a la.

Tun season-ah Spanish midfielder ṭha Thiago Alcantara a la inlan thei lo a, Bayern Munich midfielder hlui hi a rawn kir mai rih dawn loin a lang bawk.

Hetihlai hian season bul ṭan ṭha tak Darwin Nunez chu international break-a ram tana a inlanna lamah a inhliam bawk a, kum 24 mi striker hian Wolves a hmachhawn thei dawn nge dawn lo tih chu he thu buatsaih a nih lai hian kan la hre thei lo.

Liverpool hian captain Virgil van Dijk chu hrem vangin an la chhawr thei dawn lo bawk a, hetihrual hian tun hnaia inhliam vanga inlan thei lo Ibrahima Konate chuan training a zawm leh tawh.

French defender hi a inlan thei a nih chuan tlarhnung laiah Joel Matip nen inkawp thei tura ngaih an ni a, Arnold a la inlan thei lo a nih chuan Joe Gomez-a'n right back lamah a hmun ruak a hnawh khat thei bawk ang.

Reds hian nipui transfer tawp nia an lakluh Ryan Gravenberch an nei tawh bawk a, Dutch midfielder hi Klopp-a'n a chhawr tawh ang em, tih pawh hriat châkawm tak a ni ta - vawiinah dam kim lo chungin Reds an inlan dawn a, hnehna chan erawh an beisei ang.