Blues coach Poch a khauh

Chelsea manager Mauricio Pochettino chu training leh team enkawl danah a khauh hle niin an sawi a, player an insiksawi nasat bawk avangin intuaithar an tum nasa hle tih a chiang.

Nipui bazarah Chelsea hian an player neih sa tam tak an hralh chhuak a, an seng lut hnem hle bawk - nikum lama boruak ṭha tawk lo leh khelh dan hmang fuh tawk lo an neihte kha siamṭhat an tum a ni.

Chelsea winger Noni Madueke chuan, "Coach ka hrawn tawhah chuan a khauh ber a la ni, training a hautakin thawhrim a ngai hle a, keimah chauh ni loin player dangte pawhin kan mamawh tak a niin ka hria.

"Poch hi manager ṭha a ni tih chu kan hre vek a, hei bakah hian mihring mihrinna lamah pawh mi ṭha tak a ni bawk," tiin an manager a fak thiam hle.

Argentina manager hian hna a thawk hautak viau a ni mai thei a, an result erawh duhthusam a la ni lo hle thung. Premier League match li an khelh tawhah point li chauh hmuin 12-naah an awm mek.

Chelsea hian Pathianni zan dar 6:30-ah Bournemouth an lenchilh ang.