Zanin dar 11:00-ah Der Klassiker

Bundesliga-ah zanin dar 11:00 hian champion lai Bayern Munich leh anmahni elpha ber Borussia Dortmund an inkhel dawn. Bavarians leh Dortmund inkhel hi Der Klassiker (German Clasico) tih a ni a, team pahnih hian point 15 ve ve an hmuh mek avangin Bundesliga hmahruaitu tur zawnna a ni thei ang.

October 1 khan team pahnih hi DFL Super Cup-ah an inhmachhawn a, Bavarians 3-2 in an chak hram. Hemi ṭum hian Bayern player thar Leroy Sane leh Eric Maxim Choupo-Moting te an tel lo a, tun ṭum hi Der Klassiker-a an vawi khat inlanna tur a ni thei ang.

Dortmund-in rawlthar duhawm Gio Reyna leh Jude Bellingham bakah tlema tawnhriat ngah tawh Erling Braut Haaland leh Jadon Sancho te an kawl. Norwegian striker hian an intawn hnuhnun berah goal a khung a, zanin an inkhelhna tur hi Signal Iduna Park a ni bawk nen a tawrhlelhawm leh khawp ang.

Chutihrualin Bayern-in pressure sang do dai turin tawn-hriat nei ṭha Manuel Neuer, Jerome Boateng, Thomas Muller leh Robert Lewandowski te an kawl a, an intawnna hnuhnung bera chakna goal khungtu Joshua Kimmich pawh innghahna tlak tak a ni ta. 

Kum 25 mi Kimmich hi World Cup-a Germany champion puitu captain Philipp Lahm nena khaikhin a ni a, 5 ft 9 in leka sang ni mah se a huaisenna leh finna avangin khelmualah a ṭangkai ṭhin hle.