Europa League semifinal khel tur chinfel a ni dawn

European football-a club inelna sang ber dawttu Europa League quarterfinal thawh hnihna chu zaninah khelh a ni dawn a, Premier League club Wolverhampton Wanderers leh Sevilla inkhel turin ngaihven a hlawh hle.

Nizana quarterfinal inkhel thawh khatnaah Inter Milan vs Bayer Leverkusen leh Manchester United vs Copenhagen an inkhel a, he thu buatsaih a nih lai hian an result kan hre hman lo. Zanin dar 12:30-ah inkhel pahnih a awm ve leh dawn a, Wolves leh Sevilla bakah hian Ukrainian club ṭha Shakhtar Donetsk leh Swiss club langsar FC Basel te an inkhel ang. 

Covid-19 vangin Europa League hi quarterfinal aṭang chuan mini-tournament anga kalpui a ni tawh a, Germany-ah knockout hmangin khelh a ni tawh - hei tak hi boruak siamtu a ni a, vawi khat chetsual a pawi thui tawh dawn. 

Nizan lama inkhel te angin zanina inlan tur club pali hi langsar vut lo mah se team intluk tawk tak, an khelh ṭhat ni chuan khawvel club ṭha leh langsar pawh hneih thei khawpa theihna nei sang an ni a, a hmuhnawm loh ring suh. 

Football ngainatu zingah Julen Lopetegui hming hre lo kan awm kher lo ang - he coach hi World Cup 2018 ṭan dawna Real Madrid coach ni tura puan a nih avanga a team enkawl lai Spain national team-in an ban tak kha a ni a, he thutlukna hi a larpui hle. 

Real Madrid-ah beisei angin che zui lo mah se June 2019 khan Sevilla hi a zawm a, match 51-a enkawl tawhah vawi riat chiah a la tlawmpui avangin hna a thawk ṭha tih a chiang. La Liga-ah pathumna Atletico Madrid nen an point hmuh zat inang chungin palina an ni a, pangana Villarreal nena an inthlauhna chu point 10 a ni. 

Lopetegui enkawlna hnuaiah he team hi team hmuhnawm an ni a, quarterfinal lut tura an team hneh pawh hi Italian club ṭha AS Roma an nih avangin an chhe lo tih a chiang - Sevilla hian February hnua inelna hrang hrang an hmachhawnah tlawm an la nei miah lo!

Sevilla hian tun season inelna hrang hranga goal 16 khung tawh Lucas Ocampos leh Barcelona aṭanga inzir chhuak, goal 10 khung tawh Munir El Haddadi-te an nei a, Wolves tan fimkhur a 

finthlak ang. 

Spanish club tan kar hnih liam taa Covid-19 kai tih hmuhchhuah midfielder Nemanja Gudelj tih loh chu inlan thei lo tur an awm lo a, midfield-a khel turin goal ruk khunga assist vawi nga nei tawh Oliver Torres a la awm tho avangin buaina tur erawh a ni lo. 

Premier League 'Big Six' te el pha ber chu Wolves an ni a, Portuguese coach Nuno Espirito Santo enkawlna hnuaia khel team hian English top flight league-ah football mawina an pho chhuak ṭhin. 

Si ban nghaktu Rui Patrício aṭanga tlarhmaa an chhuanvawr Raul Jimenez thleng hian en ila, theihna nei sang leh tawnhriat ngah tak awm khawm an nih avangin Europa League inkhel boruak sangah an talbuai lo ang tih a chiang. 

Wolves hian January velah kha chuan Champions League khelh hial an sawi ri ve hman a, mahse table-ah pasarihna nichungin season an khar - Europa League nomawi chawi hi Champions League ticket a nih tel avangin Sevilla hneha final luh ngei an tum dawn. 

Premier League club tan an tum ram thleng turin tun season inelna hrang hranga goal 27 khung tawh Jimenez leh goal 16 khungtu Diogo Jota ten an hna an thawh a ngai a, midfield aṭanga amah chawmtu Ruben Neves leh Jose Moutinho ten an theihna an lantir a ṭul bawk ang. 

Wolves hian hrem vangin winger Daniel Podence an chhawr thei dawn lo a, Olympiakos an hnehna inkhela inhliam full back Jonny Castro a inlan thei dawn lo bawk - Ruben Vinagre leh Leander Dendoncker tan bul ṭanna hun ṭha a awm dawn tihna a ni.

Mizo football ngainatu zingah Shakhtar leh Basel hi an mikhual lo - European football-ah an inlan fo avangin hmelhriat an hlawh a, he team pahnih hian zaninah Europa League semifinal luh an inchuh dawn. 

Ukrainian champion Shakhtar hian Europa League-a an match hnuhnung paliah goal 10 an khung a, Basel lakah goal khung tura inthlahrun thut an tum lo ang. Hriat tel tur erawh Swiss club Basel-in goal khung an harsat bik lo tih hi a ni. 

Basel hian Europa League-a an match hnuhnung paliah goal riat an khung a, an lamah a lut miah lo bawk - goal khung piah lamah a ven an thiam tel tihna a ni a, attacking na Shakhtar-in an nawr tur hi hmuh a châkawm hle. 

Shakhtar hian tlarhmaah tun season inelna hrang hranga goal 22 khung tawh Junior Moraes an nei a, thlawp turin goal 13 khungtu Marlos leh goal 10 khung tawh Taison an nei a, inelna hrang hranga goal riat khung tawh leh assist vawi sarih nei Alan Patrick a la awm cheu. 

Basel hi chhuan tur nei lo erawh an ni bik lo - Arthur Cabral hi goal 18 khung tawh a ni a, Shakhtar goal nawr na dangchat turin defensive midfielder tawnhriat nei ṭha Taulant Xhaka an nei bawk.