Valencia-in Real Madrid an chelh ding
Gary Neville-a enkawl Valencia chuan Real Madrid an chelh ding a, Pathianni zan khan Mestalla Stadium-ah 2-2 in an inhnehtawk.
Real-in minute 21 chhung chu player 10 nichungin an khel a, Croatian midfielder Mateo Kovacic chu Joao Cancelo a tih tluk avangin hnawhchhuah a ni.
Inkhel ṭan aṭanga minute 16-na leka Karim Benzema goal khung chu Valencia-in penalty hmangin an sut a, minute 45-naa mualneitu si phurh sutna hi Dani Parejo pet goal a ni.
Real-in minute 82-naah Gareth Bale hmangin hma an hruai nawn a, minute khat pawh a liam hmain Valencia tan Paco Alcacer chuan hnai set sawt aṭang-in an si phurh sutna goal a tauh lut.
Valencia tan Manchester City striker hlui Alvaro Negredo-a'n goal khungna hun ṭha a neih chhunzawm a, mah se Real keeper Keylor Navas zawnah tak petin hun ṭha a bawh pelh.
Hun tawp thlengin goal dang a lut tawh lo a, team pahnihin goal hnih ve ve khungin an ṭin.
Neville a tan lawmna
Mahni khelmuala draw result hlawhchhuah hi thil lawmawm niin lang lo mah se Real Madrid leh Valencia squad neih dan enin Valencia manager Gary Neville-a tan Real draw hi result lawmawm a ni.
Manchester United defender hlui hian Valencia a enkawl hnuah Champions League-ah a team hi a tlawm pui a, La Liga match thum aṭangin point hnih a hlawhchhuahpui a, Spanish Cup-ah league hnuai lam club Barakaldo an hneh hram.
Real-in player sawm lek ni-chunga an khelh hnuah Neville-a'n substitution awmze nei a siam a, second half-a a luhtir Rodrigo-a'n an si phurh sutna goal tur Alcacer-a tan a siamsak a, substitute tho Negredo chu Real tlarhnung tan a hnawksak hle bawk.
Benitez a tan lungngaihna
Real Madrid manager Rafael Benitez-a'n Real fans zingah aiin Valencia fan-te zingah lawm a hlawh zawk. Benitez hian Valencia hi season thum a enkawl chhungin league title vawi hnih a chawipui bakah UEFA Cup nomawi a lo hawnsak tawh bawk.
Valencia fan-te'n an mana-ger hlui hnathawh ropui hi an la theihnghilh sak lo a, banner lian takah Benitez thlalak nen 'Kan lawm e' tih tar chungin an manager hlui hi an lo lawm.
Mahse, Mestalla Stadium-ah result ṭha a hlawhchhuah zawh loh avangin dinhmun derthawng anga an sawi reng Benitez dinhmun hi a him lo hle nia ngaih a ni.
Real hian hmahruaitu Atle-tico Madrid chu point liin an phak lo mek a, an chung chiaha awm Barcelona chu vawi khata khel tam zawk nichungin point hnihin an phak lo bawk.
Madrid player langsar-te nen inngeih lo nia an sawi Benitez hian goal khungtu Karim Benzema chu second half-ah winger Lucas Vazquez hmangin a thlak a, French striker hi a lungawi loh hmel hle.
Benitez hi a player ṭhate nen an thu a inhmu lo reng a, beisei ang result a hmuh loh fo chuan Real lam hian an ban a nih pawhin a mak lo ang.
Eng nge an sawi?
Real Madrid coach Rafael Benitez chuan, "Ka team-te khelh dan khan fak a phu hle a ni. Ka chungchang thuah thuthang hrang hrang a awm a, engmah sawi theih ka nei lo. Game ṭha tak kan khel a, player sawm kan nih hnuah pawh theihtawp kan chhuah a ni," tiin a naute khelh dan chu a chhuan thu a sawi.
Valencia manager Gary Neville chuan, "Ka player-te an in fit a, an chak ṭha a, tlarhnung kan remkhawm fuh a, ball kan in pass kual ṭha hle bawk. Ka beisei ang thil tam tak zaninah khan ka hmu a, Valencia ka enkawl hnua kan khelh ṭhat ber ṭum a ni. He hmunah hian thla ruk lek contract nei mah ila, cham chhunzawm zel ka duh a ni," tiin Spanish club enkawl chu nuam a tih thu a sawi.