Mercedes hmaah Verstappen a thleng

Season kal laia Mercedes chak kaltluang lai chu tihtawp a ni. Pathianni zana tlan zawh tak 70th Anniversary Grand Prix-ah Red Bull driver Max Verstappen-a'n hnehna a chang a, a hnungah Mercedes driver pahnih Lewis Hamilton leh Valtteri Bottas te an thleng.

Silverstone tlan kawngah Hamilton-a'n hnehna chang zo lo mah se a teammate Bottas tlan pelin pahnihna dinhmun a luah a, championship-ah point 30 zetin hma a hruai fal zel. Michael Schumacher-a record nih rualin a vawi 155 nan dawhsan (podium) chang pha chinah a awm.

Tun season-ah intlansiak panga a awmna chiah a ni a, a hmasa paliah chuan Mercedes driver pahnih Hamilton leh Bottan ten hnehna an chang. 70th Anniversary Grand Prix-ah erawh thawnthu ziah danglam a ni ta.

Coronavirus vangin ruahman lawk angin season an hmang thei lo. Silverstone tlan kawngah hian a zawnin inelna pahnih an neihna a ni, Dutch driver hian a hmasa ber aṭanga tlan chhuak Bottas tlan pelin hnehna a chang.

Verstappen chuan, "Mer-cedes khan engtiang takin nge ruahmanna an rawn siam dawn kan hre lo a, keini lam chuan a ṭha thei ang bera tlan turin kan in buatsaih tawp. Kan tyre thlan a fuh a, intlansiak harsa taka hnehna kan chang thei hi a hlu," a ti.

Kum 22 mi Verstappen hian car intlansiakna sang berah a vawi kua nan hnehna a chang a, season kal laiah point 77 hmuin pahnihna a ni mek. A chungah hian champion lai leh hmahruai mektu Hamilton chauh a awm.

Kar hmasaa British Grand Prix an tlan ṭumin Mercedes tyre hman a fuh lo, tlan ṭha tak Bottas a chet fuh loh phah - Hamilton pawh hnehna chang mah se intlansiak tawp dawn lamah a car ke (tyre) a chhe viau, tlan belh tur la awm se a tlan chhunzawm thei lo hial ang.

Hamilton chuan, "Kan tihsual leh dik lohna lai ṭhenkhat chu kan siamṭha ta a, tyre chhe lutuk loin kan tlan tluan thei. Mahse ṭha vek erawh a la ni lo, pahnihna dinhmun luah tur pawh khan harsa taka beih a ngai. Red Bull leh Max-a khan fak an phu hle," tiin a elpui team a fak.

Mercedes leh Red Bull ten point an hmuh belh zel a, team hlun leh changtlung Ferrari erawh an che fuh hlei thei lo. Charles Leclerc chu palinaah a thlen laiin, world champion vawi li ni tawh Sebastian Vettel chu 12-na a ni phak hram; an elpui team pahnih an phak lo viau.

German tlangval Vettel hi intlanisak tir lam kawngkawi hmasa berah a che fuh lo nghal a, kawngpuiah a khamphei deuhthawin a awm hial. Mahse chhiatna nasa zawk thleng loin a tlan tluan thei hlauh, car sen a khalh hnuah erawh tun hma lama Red Bull car nena a ropuina ang kha a nei thei ta lo a ni.