Leverkusen-in Chicharito hralh an tum lo

Bayer Leverkusen sporting director Rudi Voller chuan tun season-a che ṭha tak an striker Javier Hernandez chu January transfer-ah chhuak tur anga sawi awm mah se hralh tumna an neih loh thu a sawi.

Mexico international hian August thla khan Manchester United aṭangin German club hi a zawm a, tun season inelna hrang hrangah goal 19 khung tawhin November leh December 2015 khan a zawnin Bundesliga Player of the Month-ah thlan a ni.

Beisei phak baka Bayer Leverkusen lama a chet ṭhat avangin Hernandez hi Premier League lamah kir leh tur anga sawi a ni a, amah duhtu zingah Arsenal hming a ri ring hle.

Mahse Leverkusen sporting director Rudi Voller chuan, "Football club kan nih avangin hlawhtlinna chan hi kan tan a pawimawh em em a, chu hlawhtlinna chang tura kan beihna kawngah chuan Chicharito hi kan player pawimawh a ni. Hetiang tak a nih theih kan beisei vanga la lut pawh kan ni a, tun thleng hi chuan ani pawh kan hnenah hian a hlim em em a ni," a ti.

Rudi Voller chuan sawi chhun-zawmin, "Tun ang hunah hi chuan thuthang a tam em em ṭhin a, thil thleng pangngai ve reng a ni. Player hralh mamawh lo dinhmuna din chuan kan player-te hi hralh kher an ṭulna a awm lo. Hlawhtlinna chang tura kan beihna kawnga player pawimawh tumah kan chhuah tir lo ang," tiin Mexican striker chu chhuah tir an tum hmel loh hle.