Spurs-in Champions League an beisei zel

Tottenham Hotspurs-in chak result hlawh chhuak zo lo mah se Champions League an beiseina erawh a chuai lo - Premier League table-ah palina dinhmun luah zelin an hnuai chiaha awm United aia an sanna chu point thum a ni.

Pathianni zan khan Totten-ham hian Goodison Park-ah Everton an luhkhung a, goal khat ve ve khungin an inhnehtawk.

Mualneitu team tan Spurs player hlui Aaron Lennon chuan minute 22-naah a club hlui lamah goal a khung a, Tottenham tan rawlthar duhawm Dele Alli chuan minute 45-naah a sut.

Spurs tan Harry Kane chuan goal post a pet per bakah Ben Davies chuan crossbar a pet per bawk. Everton-in Spurs tlarhnung an chhaih buai ve tho a, Muhamed Besic goal shot ṭha tak chu Hugo Lloris-a'n ropui taka a dan bakah Romelu Lukaku-a'n a hun ṭha neih goal-ah a chantir thei lo bawk.

Rawlthar duhawm Alli

Spurs tan rawlthar duhawm Dele Alli a hmuhnawm a, January 2015-a Tottenham-in League One club MK Dons aṭanga pound maktaduai 5-a an lei Alli hi football khawvel tan a thiamna hmuh hmaih chi a ni tawh lo.

Tottenham si phurh sutna goal khung tura Toby Alderweireld-a long pass control-a a pet goal dan hi 'player thiam bik' lo tan chuan tih chi a ni lo a, kum 19-a upa midfielder hi Spurs tan innghahna tham a ni.

England tan pawha inlan tawh Alli hi tlarhmaa Harry Kane nen an inman hle a, hei Spurs mai bakah England tan chanchin lawmawm tih loh rual a ni lo.

Tun hnaia Spurs khelh dan enin Champions League mai bakah Premier League nomawi hial an beisei a nih pawhin a awm lo hran lo ang.

Everton buaina

Merseyside club Everton hian an khelmuala league match thum an khelh hnuhnungah chak hmel an hmu ta lo. Everton squad en hian an chhe lo tih a lang a, kum 1980 chho hnu lama squad an neih ṭhat ber ṭum ang hiala ngaih theih an ni.

Player naupang leh thiam tak tak Lukaku, John Stones, Ross Barkley leh Gerard Deulofeu-te an kawl a, Premier League club dangte chil ti puttu player an kawl nual chung hian manager Roberto Martinez-a'n a naute a kaihhruai ṭha tawk lo.

Everton fans tam zawkin tun hnaia che chhe tak an keeper Tim Howard an tih el a, hun harsa a vawi tam tak lo chhanchhuak tawh ṭhintu keeper hi Spurs nen an inkhelh ṭuma ball awlsam tak tak a manin tih el nan kut an lo beng vel a ni.

Eng nge an sawi?

Spurs boss Mauricio Po-chettino chuan, "Game ropui tak kan khel a, kan khel kha a hmuhnawm hle. Ka naute tumruhna avangin ka lawm a, point hnih kan hloh avangin pawi ka ti hle thung. First half kha kan khel ṭha takzet a, Everton-in goal hmahruai an khung kha an vannei a ni," a ti.

Pochettino chuan sawi chhunzawmin, "Kan rilru a paukhauh a, kan tum a ruh a ni. Goodison Park hi inkhelh harsatna hmun a ni a, Everton hi tum an hautak em avangin kan inchhuang tur a ni. Hnehna chan tumin engtiklai pawn kan khel ṭhin a, football a nih miau avangin a theih reng si loh a ni," tiin an vanduai thu a sawi.

Everton manager Roberto Mar-tinez chuan, "Kan result-ah hian ka lawm a ni. Team pahnihin chak tum ve vein kan khel a ni. First half bikah kha chuan ball kan hloh awlsam em em a, kan tana pawimawh erawh second half-a kan beih let dan kha a ni. Kan khelmualah kan tlarhnung lam a ngaihtuahawm
ṭhin a, chu chu kan tuar leh ṭhin," tiin a tlarhnung player-te'n insiam-
ṭhat an mamawh thu a sawi.