2015 SAFF Championship Mizo 3 telna India an champion
Jeje Lalpekhlua'n SAFF Suzuki Cup 2015 final-ah goal a khung a, India an champion. SAFF Championship-ah Hnahthial tlangval Jeje hi champion team-a vawi thum a telna niin India captain hlui Baichung Bhutia record a nih rual chiah a, player khel lai zinga champion ngun ber a ni. Afghanistan hnehtu India team-ah hian Mizo pathum Jeje, Lalchhuanmawia leh Lallianzuala Chhangte te an tel.
Pathianni zan final hmuh-nawm takah Afghanistan mid-fielder Zubayr Amiri chuan minute 70-naah goal a khung a, India-in Mizo tlangval Jeje hmangin minute 72-naah an chhang let. Minute 90 chhunga chak zawk an awm loh hnuin minute 101-naah India captain Sunil Chhetri-a'n chakna goal a khung.
India hian SAFF Cup vawi 11 an khelh tawh aṭangin vawi ruk an champion a; Afghanistan, Bangladesh, Maldives leh Sri Lanka te vawi khat ṭheuh an champion tawh bawk.
Final chu
India team-a Mizo pathum awm zingah Jeje chiahin khelhna hmun a chang a, inkhel boruak a san avangin hun tawp thlengin rawlthar duhawm Lianzuala a inlan lo.
Trivandrum International Stadium-a inkhel entu 40,500 hmaah Jeje a zam mai lo a, Afghan defender-te tan a hnawksak hle. Hnahthial tlangval hian first half-ah crossbar a tauh per a, second half-ah crossbar a pet per bawk. Semifinal-a goal hnih khungtu Jeje-a'n minute 72-naah a thawhrim rah a seng a, Afghanistan goal khung
aṭanga minute hnihna lekah goal pawimawh a khung.
Final-ah hian team pahnih an inhnehtawk a, final kal-kawnga che ṭha zawk Aghani-stan hun tawp lamah an vanduai. India captain Chhetri goal khung hnuah mikhual team hian sutna hun ṭha an hmang ṭangkai lo a, Japanese referee Kimura Hiroyuki-a'n penalty ni ngei tura ngaih ṭum hnih a pe lo bawk.
Chhetri a ropui
India captain Sunil Chhetri-a'n chakna goal a khung a, ram tana a goal 50-na a ni. Kum 31-a upa Chhetri hian goal 50 khung turin match 88 a mamawh a, khawvel huapa player lar Cristiano Ronaldo (Pld-123, Goals-55) Lionel Messi (Pld-105, Goals-49) leh Wayne Rooney (Pld-109, Goals-123) te aiin ram tan bik chuan record a nei ṭha zawk.
2015 SAFF Championship-ah Chhetri hi best player-ah thlan a ni a, goal li khungtu Afghan forward Khaibar Amani chu top scorer a ni.
Jeje a ni tlat
Mizo chauh pawh ni lo, India ram pum huapin Jeje-a record a ropui. Hnahthial tlang-val hian I League-a Mohun Bagan a champion pui hnuah Indian Super League-ah Chen-naiyin a champion pui leh a, SAFF Cup-ah India a champion pui leh bawk. Mizo tlangval Jeje hian ram tan vawi 32 a inlan tawhah goal 12 a khung tawh a, inelna neih zawh takah Sunil Chhetri nen goal thum ve ve an khung a, player danglam bik a nihna chu a hunah tak a rah chhuak ṭhin hi a ni.
Final-a goal pawimawh khungtu Jeje chuan, "Season khata nomawi pathum ka chawi thei hi vanneih vang a ni a, hriselna ṭha ka neih vang a ni. Pathian min hruainaah hian ka lawm a, min
ṭantute leh ka tana ṭawngṭai ṭhinte chungah lawmthu ka sawi bawk," tiin Vanglaini palai a hrilh.
SAFF Cup-ah hian Mizo zing-ah Jeje chiah a langsar lo a, group stage-a Nepal lama goal hnih khungtu Lallianzuala Chhangte hming chherna a ni bawk.