Real-in Rafael Benitez an mamawh tawh lo A aiawh turin Zidane an la lut

May 25, 2015 khan Real Madrid chuan fan-te lawm hlawh an manager Carlo Ancelotti an ban a, a aiawh tura an lakluh chu Liverpool manager hlui Rafael Benitez a ni.

Spanish club hian Benitez an lakluh tirhin khawvela manager ṭha ber pawl a nih thu an sawi a, president Florentino Perez chhuan an manager thar chu football nunpuitu leh an club kalphung engkim hrechiangtu a nih thu a sawi bawk.

Mahse, thla sarih a liam a, Real Madrid-in Benitez chungchanga thuthar an neih chu kum 55-a upa Spanish coach an ban thu a ni a, a aiawh turin club legend Zinedine Zidane an la lut.

Real Madrid B team coach Zidane chuan, "He ka hnathawh tur hian ka thinlung leh ngaihtuahna zawng zawng ka pe dawn a, engkim hi tluang taka kaltir ka tum a ni," tiin Real Madrid enkawl tura ruat a nih hnuah a sawi.

Florentino Perez-a'n kum 12 chhung Real Madrid president dinhmun a chelh tawh a, Zidane hi kum 12 chhunga manager 11 a rawihna a ni.

Benitez ban chhan

Real Madrid-ah Benitez-a record a chhe lo. Match 25-a enkawlah vawi thum chiah a tlawmpui a, vawi 17 hnehna chanpuiin vawi nga an khingpuite an inhnehtawkpui.

Champions League group stage-ah match hnih khelh tur la awm chungin last 16 a luhpui a, Swedish club ṭha Malmo chu 8-0 in an sawp hial. Benitez hian league match-ah Real hi Rayo Vallecano lakah 10-2 in hnehna a chanpui bawk a, kum 1960 hnuah goal kua aia tam an khung leh hmasak ber a ni.

Record ṭha tak a nei chungin Benitez-a tana thil pawi tak pakhat chu Barcelona laka Real a tlawmpui kha a ni. November thla khan a El Clasico hmasa berah Benitez a mualpho a, an hmelma club-in 4-0 in an sawp. Hei hi Benitez-a hian a tawrh phah tih loh rual a ni lo.

Chelsea pawh lo enkawl tawhtu manager hi khawvela attacking player ṭha ber pawl nei chunga defensive game khelh a hrat avangin sawisel a ni bawk a, a player langsar tak tak zingah Real fachuam Cristiano Ronaldo nen an inngeih lo fal nia sawi a ni a, ualau takin captain Sergio Ramos nen media kaltlangin an inbei a, Karim Benzema, James Rodriguez leh Isco-te nen an inkar a ṭha lo nia sawi a awm bawk.

Real manager Zidane

Khawvel footballer piang tawh zinga ropui ber pawl Zidane-a'n khelmual chhunga tawnhriat ropui tak tak a lo neih tawh hi hai der thiang a ni lo a, sawi hmaih theih a ni lo. Mahse, Zidane hian coaching lamah tawnhriat a la nei tlem hle a, top level-ah phei chuan tawnhriat a la nei lo.

Zidane lakluh hi Real tan 'risk' a ni a, a che fuh lo a nih chuan French player ropui ai hian club president Florentino Perez a mualpho ang a, a che ṭha a nih erawh chuan FIFA world player of the year hian fak a hlawh thung ang.

Eng nge an sawi?

Real president hlui Ramon Calderon chuan civic engineer Real presi-dent Perez sawiselin, "Engineer a ni a, engmah a hre lo. Kei hi lei (bridge) dawh turin min ti se, a chim hma ngawt ang. Chutiang chiah chu a ni," tiin Perez chu football chungchang engmah hre loah a puh.

Calderon chuan sawi chhunzawmin, "Fans zawng zawngin Carlo Ancelotti an ngainat laiin a ban a, Zidane hian ṭha taka hna a thawh theih nan duhsakna ka hlan a, mah se a harsa dawn a ni. A hlawhtling lo a nih chuan Jose Mourinho kan hmu leh thuai ang," a ti.

Real Madrid manager hlui John Toshack chuan, "Madrid-ah chuan kum hnih i cham a nih chuan i cham rei hle a ni ang. Nomawi i chawi mawlh mawlh a ngai a, hlawhtling taka team i kaihhruai a ngai a ni. Barca laka 4-0 a an tlawm avangin Rafa dinhmun kha a chhe lehzual a, Perez-a tan boruak a rih phah a, kawng awlsam ber nia a hriat lam hawiin hma a la a ni," tiin Perez-a chuan amah inhumhim nan Benitez chu a banah a ngai.