Club tal buai Man United-in Everton hmachhawn dawn

Manchester United-in zanin dar 6:00 hian Goodison Park-ah Everton an hmachhawn dawn.

Red Devils -in an match hnuhnung pahnihah Istanbul Basaksehir leh Arsenal an hneh loh avangin manager Ole Gunnar Solskjaer chu ban theih dinhmunah a ding.

Club thuneitute lam erawhin Norwegian manager Solskjaer an chhan a, Everton lakah chak lo mah se an ban dawn lo niin sawi a awm. Chutihrualin Toffees laka United khelh dan hi Solskjaer-a hmalam hun hriltu a ni thei ang.

United ṭantu zinga Solskjaer ban duhna a tam chhan hi Basaksehir leh Gunners laka an chak loh hrim hrim vang ni loin an khelh dan vang a tih theih a, Everton lakah attacking football hmuhnawm an khelh a ṭul dawn. 

Norwegian manager thlak tura an sawi Mauricio Pochettino hi kum hnih liam ta khan United CEO Ed Woodward-a'n a dawr tawh. Thawhṭanni zan khan Argentine manager Poch chuan, "Team enkawl turin ka inpeih. Amaherawhchu ka thil tum ang tih hlawhtlin theihna club an nih a ngai thung," tiin a sawi.

United lamin player thar Alex Telles chu Covid-19 positive vangin an la chhawr thei lo a, Anthony Martial-a'n hremna hmang zoin a inlan thei tawh dawn.

Everton lam pawhin hrem vangin Richarlison chhawr thei dawn lo mah se Lucas Digne a rawn kir dawn a, playmaker pawimawh James Rodriguez leh midfielder ṭangkai Andre Gomes-te an dam hman a beiseiawm bawk.