Bagan hmachhawn turin Aizawl FC an chhuak

India ram club-te tana football inelna lian ber I League chu January 9, Inrinni hian khelh ṭan a ni dawn. Mizoram Premier League champion Aizawl FC-in Inrinni zan dar 7:00-a an match hmasa berah I League champion Mohun Bagan chu Salt Lake Stadium-ah an hmachhawn dawn a, vawiin hian Mizoram an chhuahsan ang.

Aizawl FC coach Manuel Retamero chuan, "Ka tan chuan MPL kha chona thar a ni a, hlawhtling takin kan zo a ni. MPL kan khelh chhungin ka player leh team-ah hmasawnna tam tak ka hmu a, Chanmari FC kha league stage-ah kan hneh hram a, final-ah Valpuia tel loin 3-0 in kan hneh a ni. Thla li chhung vel lekin Aizawl FC khelh dan hmel hmang kan thlak a, player-te hmasawnna ka hmu a, a bik takin Brandon, Valpuia, BT-a, Albert leh MS-a te hian hma an sawn a ni," tiin a sawi. Spanish coach hian ṭan chhan ṭha tak a nei a, MPL4 result aṭangin a thusawi hi a dik tih chiang.

MPL champion hian I League khel turin an squad an tichhah a, Japanese forward Atsushi Yonezawa an la lut a, MPL3 best defender Emma Chigozie an la let a, nikum I League-a Royal Wahingdoh tana khel kim vek thei Lalchhawnkima, India junior team midfielder Lalramzauva, an captain hlui Ricky Lallawmawma leh MPL best keeper Lalawmpuia te chu Zo United aṭangin an la lut bawk. An player lakluh hi ṭhatpui tham an ni thei a, chutihrualin a huhoin practice-na hun an nei tam lo, nimin zinga an practice hnuhnung berah Japanese midfielder Yuta Kinowaki dam loh vangin a practice thei lo a, Nigerian defender Emma-a'n Kolkata aṭangin team a zawm chauh dawn bawk.

Aizawl FC technical director Hmingthansanga chuan, "I League team dang aiin squad kan nei fel hmasa zawk. Kan khingpui tur Mohun Bagan hian player ṭha tak tak nei mah se ISL leh SAFF Cup vangin an duh angin practice session an nei thei bik lo. I League kan khel tur hi a phurawm a, champion lai hmaah hian beisei tur kan nei," tiin a sawi. Hmingthana sawi ang hian I League club liante pawhin player an la zawng mek, contract la nei lo langsar zingah Jeje Lalpekhlua a tel.

I League boruak la tem lo Spanish manager Retamero chuan, "Ka nihna dik tak kan hriat a ngai, season khatnaah chuan tlak loh kan tum a ṭul a ni. Duhthusam chu ni se player-te hi kim hma thei se a ṭha tur a ni a, chutihrualin kan kim hma theih tak loah chuan kan harsatna neihte hi chu kan hnungchhawn tur a ni. Kan player neih angte hi thiam taka kan hman a ṭu dawn a, Mizo mipui tan theihtawp kan chhuah ang," tiin a sawi.

Aizawl FC-in K. Malsawm-kima kaihhruaina hnuaiah MPL3-ah an champion a, tualchhung football-a tawnhhriat ngah Mala'n Aizawl FC hi Mizo club zinga a hmasa ber ni turin I League a thlen pui bawk. Amaherawhchu I League club enkawl turin AFC A licence tal neih a ngaih vangin Aizawl FC hian Spanish coach Retamero hi an la lut ta a ni.

Club president Robert Ro-mawia Royte chuan, "I League-a che ṭha turin hausak a ngai a, kan khingpui turte hi keini aia sum ngah an ni. Chuvangin Aizawl FC innghahna chu Mizo mipuite an ni a, state dang club elpha turin hnam anga kan ṭanrual a ṭul a ni," tiin Aizawl FC chu Mizo mipuite kuta innghat a nih thu a sawi.

Aizawl Press Club-a thuthar thehdarhtute hmaah lawmthu sawiin Aizawl FC president RRR-a chuan, "Mizorama I League kan thlen theih nan sta-dium kan mamawh a, sorkar leh Mizoram Football Association te thawhrimna zarah Rajiv Stadium, Mualpuiah kan khel thei dawn a. An chungah kan lawm takzet a ni," tiin a sawi.

Aizawl FC I League Fixtures

Date Home Away

January 9, Inrinni Mohun Bagan Vs Aizawl FC

January 16, Inrinni Aizawl FC Vs Bengaluru FC

January 22, Zirtawpni Aizawl FC Vs DSK Shivajians

January 25, Thawhṭanni Aizawl FC Vs Sporting Clube de Goa

January 31, Pathianni Salgaocar FC Vs Aizawl FC

February 6, Inrinni East Bengal Vs Aizawl FC

February 13, Inrinni Aizawl FC Vs Shillong Lajong

February 20, Inrinni Aizawl FC Vs Mumbai FC

Ferbuary 28, Pathianni Bengaluru FC Vs Aizawl FC

March 2, Nilaini Mumbai FC Vs Aizawl FC

March 5, Inrinni Aizawl FC Vs Mohun Bagan

March 12, Inrinni Aizawl FC Vs East Bengal

April 3, Pathianni Shillong Lajong Vs Aizawl FC

April 6, Nilaini Sporting Clube de Goa Vs Aizawl FC

April 9, Inrinni Aizawl FC Vs Shillong Lajong

April 16, Inrinni DSK Shivajians Vs Aizawl FC

Note : Aizawl FC hian home match hi RG Stadium, Mualpuiah an khel ang.