Ring chhungah Pacquiao Kan hmu tawh lo mai thei

Filipino boxer ropui Manny Pacquiao chuan April 9-a Timothy Bradley nen an inhnek zawhah chuan boxing chawlhsan a tum tawh thu a puang a, Philippines rama politics lamah nasa zawka inhman a tum thu a sawi.

Philippines hian May thla khian an ram inthlanpui an nei dawn a, he inthlanah hian Pac-quiao hian chuh ve a tum a ni.

Weight division pariata champion thei awmchhun Pacquiao chuan, "Politics lama ka hun tam zawk ka hman theih nan boxing chu chawlhsan tawh ka tum a ni. Timothy Bradley nena kan inhmachhawn tur hi ring chhunga ka inhnek hnuhnung ber tur a ni tawh ang," tiin khawvel hriatah a puang a ni.

Pacquiao chuan May thlaa a hneh loh tawh Floyd Mayweather nen rematch an neih leh hma chuan boxing chawlhsan a tum loh thu sawi anga an sawi chungchang chu chhangletin, "Engtiklai mahin he thu hi ka sawi lo a, tu hnenah mah hemi chung-changah hian interview ka nei lo bawk. April 9-a inhnek ka hmachhawn zawhah boxing chu ka chawlhsan tawh ang," a ti.

Filipino boxer ropui hian kum 20 bawr vel boxing khawvela hun a hman chhungin inhnek 65 a hmachhawn a, vawi 57 hnehna changin heng zinga 38 hi a knockout a, vawi ruk a tlawm zawkah
ṭangin vawi hnih a khingpuite a inhnehtawkpui a ni.

Hetihlai hian Pacquiao hnek inbeiseitu zinga mi Amir Khan an thlan loh chhan sawiin Pacquiao promoter Bob Arum chuan, "Amir Khan hian Pacquiao hmachhawn tur hian eng thil ropui nge tih a neih tawh? Pawisa kan ngaihtuah tel lo thei lo a, Amir Khan hian sum lamah min puih ṭhat theih kan beisei lo a ni," tiin Amir Khan aia Bradley an thlan chhan a sawi.

Bradley leh Pacquiao-te hi kum 2012 khan an lo inhnek tawh a, sawisel hlawh takin WBO welterweight champion Bradley hi chak zawkah puan a ni. Kum 2014 khan inhnek nawn lehin Pacquiao a chak thung a, April 9-a an inhnek tur hi vawi thum an inhmachhawnna tur a ni ang.