Wenger-a'n Ozil chawlh tir a tum?

Arsenal manager Arsene Wenger chuan a player pawimawh Mesut Ozil chu tun kar tawp a Sunderland nen FA Cup third round an khelh turah chawlh tir a tum thu a sawi.

German international Ozil hian tun season-ah club leh ram tan match 30 a khelh tawh a, a ṭhainte goal khung tur vawi 16 a siamsak tawh. Ozil hian kum 2013 September thla khan Real Madrid aṭangin pound maktaduai 42.4-in Gunners hi a zawm.

French manager Wenger chuan, "Nikum November thla khan Mesut hi chawlh ka lo pe tawh, a chhan chu a taksa a rim em vang a ni. Player chi hrang hrang an awm a, ṭhenkhatin hun rei tak chhung ṭha taka an khelh theih laiin
ṭhenkhat erawhin chawlh an mamawh thung," a ti.

Premier League hma-hruaitu Arsenal manager Wenger chuan sawi chhunzawmin, "Santi Cazorla leh Jack Wilshere te an hliam avangin Mesut kan chhawr rim em em a, kan player pawimawh ni mah se a chau tawngkhawng ang tih a hlauhawm tawh a ni. Season tluana ṭha taka a inkhelh theihna tur chuan kan chawlh tir zauh zauh a ngai a ni," tiin a sawi.

Arsenal hian tun kar tawpa FA Cup an khelh zawh hian league-ah Liverpool, Stoke City leh Chelsea an hmachhawn chhunzawm dawn avangin an player ṭha ṭhenkhat chu team nem zawka tura ngaih Sunderland lakah hian an chawlh tir a ṭul niin a lang.