Kum tharah Chelsea thar - Mikel

Midfielder John Obi Mikel chuan kum 2016-ah chuan Chelsea-in boruak ṭha zawk nen inkhel an hmachhawn theih a beisei thu a sawi. Kumina an match hmasa berah Chelsea hian Crystal Palace chu Selhurst Park-ah 3-0 in an hneh.

Season hmasa Premier League champion Chelsea team-ah khan Mikel hi a tel ve a, mahse tun season-ah erawh an champion nomawi hi an hloh chiang tawha anga ngaih a ni. Blues hian league match 20 khelh tawh aṭanga point 23 hlawh chhuakin table-ah 14-na dinhmun an luah mek a, an manager Jose Mourinho an ban tawh bawk.

Kum 28-a upa Mikel chuan, "Inkhelh hmabak kan la nei nual a, insiam ṭha thei tur kan ni. Tunah chuan kum thar kan hman tawh avangin kum hluia Chelsea ang kha ni loin team thar ang maia kan khelh theih tawh a beiseiawm," a ti.

Chelsea hian Pathianni khian FA Cup third round an khel dawn a, third division club Scunthorpe United chu Stamford Bridge-ah an lo mikhual ang.