Inter leh Calleri an inhnimhnai

Boca Juniors president Daniel Angelici chuan an striker Jona-than Calleri chuan rei lo teah Italian club lian Inter Milan a zawm tur thu a sawi.

Serie A hmahruaitu Inter hian hun rei tak chhung chu Boca striker beiseiawm tak hi an lo thlithlai tawh a, thlasik transfer-ah an la lut thei dawn ta nge nge niin a lang.

Boca president chuan kum 22-a upa striker chungchang hi sawiin, "Tun kar chhung hi chuan tihfel ngai zawng zawng kan tifel hmanin ka beisei. Tuna kan buaina awmchhun chu Calleri ber hian tuna Inter pan nghal nge season thar law law a pan a duh zawk tih hi a ni,' a ti.

Calleri hian Boca hi a chhuahsan a nih pawn a duh chuan season tawp thleng Argentine club tan hian a khel thei dawn a, Serie A club Bologna chu thla ruk chhung a tan loan-in a zawm mai thei bawk ni a sawi a ni.