Hun ka mamawh hret - Halep

Simona Halep chuan US Open chungchanga a awm dan tur chu kar leh lamah a tih chian theih a beisei. Romanian nula hi tun kar chhunga khelh tur Prague Open-ah a inlan phawt dawn a, chumi hnuah a awm zel dan tur a sawi chauh ang.

August 31 aṭangin New York khawpuiah US Open khelh a ni dawn, player ṭhenkhat chuan hard court inelna lian khel tura US pan an hreh. World number 1 Ashleigh Barty a inhnuhdawh tawh avangin Halep hi a inlan chuan seeded pakhatna a ni thei dawn.

World number 2 Halep hian US Open chungchangah thutlukna a siam theih rih loh thu a lo sawi tawh. Zawhna chhangin Halep chuan, "Prague Open zawhah chuan ka sawi chiang thei tawh ngei ang.

"US Open buatsaihtu lamin an kalphung leh ruahmanna siam sa tih danglam an nei em tih vel pawh ka ngaihchan tel a ngai ve bawk. Tunlai boruakah chuan ram hla taka zin chhuak tur chuan ngaihtuah ngai a tam hle a ni," a ti.

World number 1 Barty bakah number 5 Elina Svitolina leh number 7 Kiki Bertens te pawh an inhnukdawk tawh a, season dang nena khaikhin chuan kumin US Open hian ngaihhlut a hlawh tawk dawn lo niin a lang - a hmunah entu fans an awm thei lo bawk ang.