Barcelona tan Turan leh Vidal inlan thei dawn

Nipui transfer-a Barcelona zawmtu Aleix Vidal leh Arda Turan-te chu an club thar tana an inlan theih loh reng hnuah Barca kawr hain an inlan ve thei dawn ta.

FIFA chuan Bar-celona hi FIFA dan kalha player an lakluh avangin player la lut thei lo turin an hrem a, Vidal leh Turan pawh hi nikum nipui bazar-ah khan la lut mah se 2015 ral hma chu an chhawr thei lo a ni.

Kum 28-a upa Turan hian Barcelona-ah hian jersey no.7 a ha dawn a, Atletico Madrid aṭanga Catalan club a zawmna zat hi pound maktaduai 26 a ni. Turkey tana vawi 87 inlan tawh Turan hian Atletico a cham chhungin La Liga nomawi a chawi bakah Champions League final a khel hman.

Right-back Vidal hian season hmasa khan Europa League-ah Sevilla chu nomawi a chawipui a, Barcelona hi pound maktaduai 13-in a zawm. Catalan club-ah hian jersey no. 22 a ha dawn a ni.

Barcelona hian zanin dar 1:00-ah Espanyol chu Copa del Rey-ah an hmachhawn dawn a, Luis Enrique-a'n a duh chuan Vidal leh Turan-te hi a chhawr thei tawh ang.

Kum 26-a upa Vidal chuan, "Coach-in min mamawh huna chhawr theih turin rim takin kan thawk a, chu chu coach pawhin a hrechiang a ni," tiin inkhel tura an inpeih tawh thu a lo sawi ve bawk.