Djokovic-a'n bul a ṭan fuh

World number 1 Novak Djokovic chuan Thawnṭan zan khan kum-ina a match hmasa ber a khel a, Dustin Brown hnehin Qatar Open first round a paltlang.

Serbian thiampuipa Djokovic hian tun hnai kum nga chhunga a vawi li nan nikum khan Emirates ATP Ranking-a pakhatna ni chungin kum a khar a, kuminah pawh a cheṭha chhunzawm nghal hle. A match hmasa berah hian minute 51 chhung lekin Brown lakah hian 6-2, 6-2 in hnehna a chang.

Kum 28-a upa Djo-kovic chuan, "Chawlhkar ruk chhung ka inkhelh loh hnuah ka inkhel ve leh ta a, ka chawlh chhungin ka taksa fir theih nan ka insawizawi reng tho avangin court-ah harsatna ka tawk lem lo. Kum bulṭanna ṭha tak ni chuan ka hria," tiin a sawi.

Inkhel dangah seeded pangana Feliciano Lopez a chak lo thung a, Spanish star Lopez hian Daniel Munoz de la Nava lakah vawi 24 ngawt ace siam thei mah se a chhawr ṭangkai zo lo a, darkar hnih leh minute 25 chhungin 3-6, 7-6, 7-5 in a tlawm a ni.