Germany jersey nena chak loh kan duh loh - German coach

German Students National Football Team chuan nimin khan Aizawl an rawn thleng a, tlai lamah Regency Hotel-ah press conference nei nghalin coach Marcus Jung chuan, "Germany national jersey kan hak tawh chuan player-te hi an theihna zawng zawng chhuah tura ngaih an ni a, chak loh kan duh lo," tiin Mizoram XI hmaa tlawm an tum loh thu a sawi.

Vawiin tlai dar 3:30 hian Lammualah Mizoram XI leh German Students National Football Team te an inkhel dawn. Tun ang hun hi football ngaihnatuten thleng reng tura an duh, a thlen leh kher pawh rinawm tawh si lo a ni a, Mizo mipui tan hun ṭha bawhpelh chi a ni lo.

Hoffenheim-in Mizoram an rawn tlawh tawh a, tun ṭuma rawn kal German team hian Bundesliga club laka 3-0 leka Mizoram XI an chak lo kha mak an ti a, result
ṭhaah an ngai. German coach Marcus chuan, "Hoffenheim leh keini hi chu khaikhin chi kan ni lo. Amaherawhchu German kan ni a, kan kalna apianga chak hi kan duh a ni. Attacking football khelh kan duh a, chutihrualin Mizoram XI hi kan hriatchian loh avangin fimkhur takin kan khel ang," tiin Mizoram XI chu fimkhur taka an hmachhawn tur thu a sawi.

German team hi University zirlai an ni a, Inter University inelna a cheṭha aṭanga thlan an ni. Mizoram hmachhawn tur team hi professional leh semi-professional footballer chawhpawlh an ni a, tun ṭuma an captain Steffen Wohlfarth hi pro-fessional footballer ni
ṭhin electrical engineering a zir zui avanga hun puma inkhel tawh lo a ni.

Bayern Munich II tan pawha khel tawh Wohlfarth chuan, "Bayern-a ka awm laiin senior team player Bastian Schweinsteiger leh player lar tak tak te nen training kan nei ho a, ka hun tawna nuam ber erawh Scottish club Ross County tana ka khelh lai niin Celtic FC lamah chakna goal ka khung a, ka hun tawn ropui ber zinga mi a ni," tiin a sawi. Scotland-ah hian Wohlfarth hi 'Wolf' tiin hming lem an vuah a, a chet ṭhat ṭhin avangin Chinghnia û angin mipui an û rual ṭhin.

FC Ingolstadt 04 striker Wohlfarth chuan Mizoram XI lamah goal khung ngei a tum a, a khung theih a inbeisei a, Mizo mipui erawh an û rual a beisei lo.

German team technical advisor Arunava Chaudhuri chuan, "ISL-a Jeje-a che ṭhate, tun hnaia Lianzuala rawn larte hian Mizoramah football-in hma a sawn tih a nemnghet a. Amaherawhchu Aizawl kalna ber bridge (lei) erawh insiamṭhat vat a ṭul a ni," tiin fiamthu pahin Mizoram hmasawnna a sawi.